MINGHOY na sud sa prisohan ang tulo ka mga indibiduwal human nga nadakpan atol sa buy-bust nga gihimo sa mga sakop sa Philippine Drug Enforcement Agency Davao Region, kauban ang National Bureau of Investigation Davao Region SEMRO ug Talomo Police Station alas 8:35 sa gabii, Marso 20, 2023, didto sa Medalla Milagrosa Street, Dumoy, Davao City.
Subay sa report sa PDEA-Davao, target sa buy-bust ang drug den maintainer nga si alyas Bugoy, 38-anyos, molupyo sa maong lugar.
Gihimo ang buy-bust human nga napalitan og usa ka pakite sa gituohang shabu nga dunay gibug-aton nga usa ka gramo kantidad og P6,000 ang suspek.
Atol sa operasyon, naaktuhan ang duha ka mga bisita sa drug den nga nag-shabu session. Nailhan kini nga sila alyas Jomar ug alyas Jaypee kinsa gipang-aresto usab sa operatiba.
Nakumpiska sa awtoridad ang upat ka mga pakite sa gituohang shabu, 14 gramos ang gidaghanon kantidad og P95,200 ug mga shabu paraphernalia.
Giawhag sa PDEA-Davao ang komunidad nga mo-report kanila kung dunay masayran nga susamang mga ilegal nga buhat uban sa pasalig nga magpabiling konpedensiyal ang mga impormasyon sa impormante.