Sugod karong adlawa, Marso 23, 2023, ang Kagamhanan sa Lungsod sa Barili mobukas na pag-usab sa livestock market sa Mantalungon subay sa paglibkas na ni Cebu Gov. Gwendolyn Garcia sa border control sa kalungsoran batok sa African swine fever.
Ang Kagamhanan sa Lungsod nipahibawo nga gikinahanglan lang nga dunay igong dokumento ang mga magpapatigayon aron makabaligya pag-usab sa Mantalongon.
Naglakip na niini ang veterinary health certificate alang sa backyard swine farm gikan sa Municipal o Provincial Veterinary Office.
Sa Martes, gitigom sa gobernador ang tanang stakeholders ug mga mayor sa lalawigan sa Sugbo aron hiusahon ang mga polisiya nga ipatuman sa Probinsya kalabot sa pakigbatok sa sakit sa mga baboy.
Human niini, gideklarar ni Garcia ang paglibkas na sa border control ug dili na pagsubay sa color-coding scheme sa pagdeterminar sa mga lugar nga dunay kaso sa ASF.
“Mapasalamaton ko ani nga development, for Gov. Gwen’s brave move kay dako kaayo nga parte sa panginabuhi sa mga taga Mantalongon ug taga Barili ang pagpanumod,” matod ni Barili Mayor John-John Garcia sa Marso 22, 2023.
Sa miaging semana, temporaryong gi-ban sa mayor ang pagpamaligya og baboy sa merkado sa Mantalongon samtang naghuwat siya sa lagda sa gobernador.
Apan sa uwahing executive order sa gobernador, gitugotan na niini ang movement sa mga baboy ug pork products sud sa hurisdiksyon sa probinsya sa Sugbo.