Andam na ang kwarta gikan sa pribadong mga negusyante aron maoy ipatiwas sa katukoran sa 10 ka andanang Cebu City Medical Center (CCMC).
Kini ang gipahibawo ni City Attorney Jerone Castillo, special assistant to the mayor on special project sa interbyu sa Superbalita Cebu sa Marso 22, 2023, apan dili pa sila makasugod pagpatrabaho gumikan sa “unresolved issues” sa unang duha ka mga contractor.
Matod ni Castillo nga dul-an P1 bilyon ang kwarta nga gi-pledge alang sa CCMC gikan sa SM Group, Ayala Group, Robinsons Group, Filinvest Group ug Chinese group nga paigo nang ihuman sa edipisyo apil na ang pag-operate sa pampublikong ospital.
“The money is there, ready naman na siya,” butyag ni Castillo.
“I told the Engineering, please give one comprehensive report so that the Office of the Mayor thru the City Attorney and the City Administrator can sit down once and for all to remove all these roadblocks so that all the money coming in, all the engineering people will prepare, we can execute the project with expediency as committed to the public,” dugang ni Castillo.
Ang City Attorney wala nihingalan kon kinsa ang mga contractor sa CCMC apan wala nay labot niini ang ME Sicat Construction Inc. sanglit nasulbad na ang ilang problema nga wala niabot sa korte.
Ang mga contractor nga nakatrabaho sa CCMC mao ang CE Padilla sa phase 1 ug phase 2 samtang ang phase 3 gitrabaho sa C.B. Garay Philwide Builders.
Si Engr. Ruel Tahum sa Department of Engineering and Public Works (DEPW) nagkanayon nga ang “unresolved issues” mao ang variation nga gipatuman sa CE Padilla ug CB Garay nga hangtod karon wala pa mabayri.
Kini nagkantidad og kapin o kulang P60 milyunes, ang P40 milyunes kolektahunon sa CE Padilla dihang ang duha ka contractors maoy nagtrabaho aron maabli ug mahimo nang operational ang unang tulo ka mga andana dihang nipuli si Mayor Michael Rama kang anhing mayor Edgardo Labella.
“There are issues nga wala nila gi-raise ni Mayor nga kon ila pa untang gi-raise would have been also resolved immediately like what we did with ME Sicat. And I think kaning issues with the other contractors must be dealt similarly. Otherwise ma-delay ang schedule nga provide ni Mayor kay iya bayang gusto the shell will be completed by December and everything including sa services nga gi- provide based sa iyang timeline,” pasabot ni Castillo.