Ipadayon ang control points ug color-coding scheme sa dakbayan sa Sugbo aron ma-regulate ang pagsulod sa mga buhing baboy ug pag-monitor sa kahimtang sa African swine fever (ASF) sa dakbayan.
Ang Dakbayan sa Sugbo nipagawas sa desisyon atol sa press conference sa Miyerkules, Marso 22, 2023, usa ka adlaw human gipahibalo sa Cebu Provincial Government nga wagtangon na niini ang border control ug color-coding sa mga dapit nga apektado sa ASF.
Si Cebu City Mayor Michael Rama nipagawas og mga lakang ug protocol nga ipatuman sa Siyudad pinaagi sa Executive Order No. 5 Series of 2023 nga nag-ulohan og Oplan Baboy.
Ang executive order nagmando sa Department of Veterinary Medicine and Fisheries (DVMF) nga ipadayon ug pakusgan ang imbestigasyon ug surveillance sa sakit, ingon man ang pagmonitor sa transportasyon ug paglihok sa mga buhing baboy ug mga produkto sa baboy paingon ug gikan sa dakbayan sa Sugbo.
Ang pangulo sa DVMF nga si Dr. Jessica Maribojoc niingon nga ang mga buhi nga baboy gikan sa mga rehistradong commercial farms gitugotan nga makasulod sa siyudad basta matuman ang mga gikinahanglang dokumento sama sa veterinary certificate.
Matod usab ni Maribojoc nga ang siyudad nagpabilin nga anaa sa “green zone” bisan kon adunay nakitang ASF sa usa ka backyard farm nga nahimutang sulod sa siyudad. (JJL)