Kapulisan sa dakbayan sa Sugbo nipasaka na og mga kasong homicide ug kalapasan sa Republic Act 11053 kun Anti-Hazing Law batok sa pito ka mga miyembro sa Tau Gamma Phi fraternity sa Miyerkules Marso 22, 2023.
Sila maoy gitumbok nga nag hazing sa tinun-an sa University of Cebu-Maritime Education and Training Center (METC) niadtong Disyembre sa miaging tuig nga si Ronnel Baguio nga niresulta sa kamatayon niini.
Uban sa kapulisan ang inahan sa biktima nga si Leny Baguio ug mga opisyal sa Volunteers Against Crime and Corruption (VACC) nga gigiyahan sa Public Attorney’s Office Central Visayas (PAO 7).
Ang gikiha mao sila si Philip Angelo Salapang, Grand Triskelion (GT); Mark Einan Hernandez, Master Initiator (MI); John Thirdy Anog, resident member; Lei Ruben Siao, Deputy Grand Triskelion (DGT); Kevin Muñoz, Deputy Grand Triskelion (DGT); Rogelson Gesalago Getaruelas, recruiter ug magtutudlo sa biktima; ug si Aldrake Suan, tag-iya sa balay diin nahitabo ang giingong hazing.
Matod ni Police Lieutenant Colonel Maria Theresa Macatangay, hepe sa Investigation and Detective Management Unit (IDMU) sa Cebu City Police Office (CCPO) nga human nila napasaka ang kaso sa Cebu City Prosecutors Office, magpaabot na lang sila kon hingpit na kini nga mapasaka sa korte aron malutsan na og warrants of arrest ang mga suspek.
Gihulagway ni Macatangay nga lig-on ang ilang kaso tungod sa mga ebidensya nga si Baguio biktima sa hazing sa mga miyembro sa Tau Gamma Phi.
“Yes, we consider this case as cleared sa amoang parlance ni sa pulis. Nya sa laymen’s term ma consider nato nga sulbad na ning kasoha kay na identify nato ang mga suspetsado ug na filan nato sila og mga kaso,” pagpasabot ni Macatangay.
NAGPASALAMAT
Gipasalamatan ni Leny ang kapulisan ug mga abogado sa PAO nga ningtabang kaniya nga mahatagan og hustisya ang kamatayon sa iyang anak ug napasaka na ang kaso ngadto sa piskaliya.
Giangkon niya nga iya nang napasaylo ang naghimo sa hazing sa iyang bugtong anak apan wala kini magpasabot nga dili na siya mopasaka og kaso sanglit tinguha niya nga dunay manubag sa kamatayon niini.
Si Manlalaban Maria G-Ree Calinawan, Regional Public Attorney sa PAO 7, niklaro nga igo lang sila nga mitabang kang Baguio nga mapadali ang kaso nga giandam sa kapulisan ug wala silay kalabutan sa paglaban niini ngadto sa korte.
Gitinguha sa kapulisan nga ma monitor nila ang lihok sa mga suspek nga dili sila makagawas sa Sugbo kay kon moisyu na og warrants of arrest ang korte, ila dayon kini nga dakpon.
Pasalig ni Colonel Ireneo Dalogdog, hepe sa CCPO, nga mahatagan og hustisya ang kamatayon ni Baguio pinaagi sa pagkabilanggo sa mga akusado.