NAMENTERYO ang usa sa mga giingong adik sa Barangay 31-D, Roxas Extension, Poblacion, Davao City human kini napusilan sa pulis atol sa buy-bust operation pasado alas 6 sa gabii, Marso 21, 2023.

Sumala sa Sta. Ana Police Station nga gitionan og pusil sa suspek nga si Nicole Majadas alyas Nikoy, ang poseur buyer, dihang nasayran niini nga pulis iyang ka-transaksiyon, apan naunhan kini sa back-up nga pulis.

Ang operasyon gipangunahan ni PEMS Danilo Daquigan ubos sa superbisyon ni Police Lieutenant Colonel Ronald Lao nga miresulta sa pag-niyutralisa sa suspek kinsa patay na kining naabot sa ospital.

Giingon ni Lao nga notadong tigpayuhot og ilegal nga druga nga shabu ang suspek sa area sa Barangay 31-D ug sa Piapi hinungdan nga gipailawom nila kini sa buy-bust oepration.

Nakuha sa posisyon sa suspek ang 3.34 gramos sa gituohang shabu nga mokantidad og P53,440 ug ang .38 revolver nga pusil.

Dugang ni Lao nga usa sa ilang mga gitutokan karon gawas sa pagbantay alang sa kahapsay ug kalinaw sa siyudad, mao ang pagpakusog sa ilang monitoring sa mga tawo nga mibalik sa ilang kanhi ilegal nga bisyo.

Ang boulevard area ang giingong ilado sukad pa niadto nga gilumloman sa ilegal nga druga.