WALAY dapit ang mga kriminal sa Davao City, kini ang iladong linya niadto ni former President Rodrigo Duterte, bisan pa sa mga katuigan sa pagka-mayor niini sa Siyudad sa Davao.
Niadtong Miyerkules, Marso 22, 2023, nagminghoy nga midangop sa kapulisan sa Sta. Ana Police Station ang usa ka fish vendor human gitulis sa suspek nga si Ivan Ermac Palma, alyas Ivan, hamtong ang pangedaron ug residente sa Isla Verde, Barangay23-C Poblacion ning dakbayan.
Saysay sa biktima nga samtang naa siya sa Piapi Boulevard kalit miduol ang suspek kinsa pugsanong mikuha sa iyang halin sa isda.
Gilayong mihimo og hot pursuit operation ang kapulisan sa Sta. Ana police nga gipangunahan ni Police Captain Rizalito Clapiz III human nga ilang naila ang suspek pinaagi sa rouge gallery sa presinto uno.
Giadtoan sa mga pulis ang balay sa suspek ug imbis nga mosurender, mikuha hinuon og pusil ang suspek dayon gipabuthan ang mga pulis, maong gi-niyutralisa kini.
Gidala pa sa Southern Philippines Medical Center ang suspek apan gideklara kining dead on arrival sa attending physician.
Narekober sa mga pulis ang usa ka .38 revolver ug ang duha ka mga pakite sa gituohang shabu motimbang sa 0.65 gramos nga mokantidad og P10,400.