DAKO ang pagtuo ni Maguindanao Provincial Police Office Director Colonel Roel Sermese nga ang pag-atake sa mga terorista mao ang pagpanimalos alas 9:15 sa buntag niadtong Marso 22 sa Mamasapano sa probinsiya sa Maguindanao del Sur.
Sa maong insidente, usa ka mga sundalo ang napatay nga si Private First Class (PFC) Jorey Abibas samtang naangol sab si PFC Jonathan Nacion, pulos sakop sa 23rd Mechanized Company sa Philippine Army.
Angol sab ang sibilyan nga si Asidza Bayao human maigo sa mga saag nga bala atol sa giyera.
Matud ni Army's 601st Brigade Commander, Brigadier General Oriel Pangcog nga ang duha ka sundalo nagpatrolya sa Barangay Libutan, Mamasapano sa dihang gipamusil sa grupo ni Kumander Tong Aban Amang sa Bangsamoro Islamic Freedom Fighters (BIFF) sakay sa mini van gamit ang M16 armalite rifles.
Nakabalos pa ang mga sundalo sa pagpabuto sa ilang hinagiban batok sa BIFF apan dali sab silang nakasibat.
Gidala sa balay tambalanan ang mga sundalo ug ang sibilyan apan si Adibas gideklara sa mga doktor nga dead on arrival.
Matud ni Sermese nga posibleng panimalos ang gihimo sa BIFF human nga napatay si Kumander Boy Jacket sa Tacurong City.
Gilusad na sa Joint Task Force Central ang paggukod sa grupo ni Kumander Amang sa Mamasapano.