GIBUTYAG sa opisyal gikan sa Department of Agriculture (DA) nga ang mga presyo sa utanon pabiling lig-on sa mosunod nga mga semana.
Gisulti ni Alexander Sibuan, DA-Davao agriculturist II, atol sa tigum nga mga utanon magpabilin sa ilang presyo tungod sa kondisyon sa panahon sa mosunod nga mga semana, ilabi na nga presyo sa repolyo ug kamatis padayon nga mitiurok tungod sa sobrang suplay.
Matud ni Sibuan nga ang kahimtang sa panhon mao ang dakong hinungdan sa pagbanabana sa dagan sa presyo niini kay krusyal kini sa pagbaton og mga suplay sa merkado.
"Daghan og factor, number one is the weather, dili nato matagna ang weather," pagtin-aw ni Sibuan.
"But given na okay ang weather , [it is] safe to say vegetables are stable prices on average for the upcoming weeks," dugang pa niya.
Ang presyo sa mga repolyo mitiurok ngadto sa P80 matag kilogramo (kg) kay daghan og suplay ang mga merkado sa Davao Region. Sa merkadong pampubliko, gibaligya kini sa P50 hangtud P80 matag kilogramo karong semanaha itandi sa P80 hangtud P90 matag kilogramo base sa pagmonitor sa DA niadtong Marso 20.
Presyo sab sa kamatis lig-on usab gikan sa miaging semana nga tag P35 hangtud P70 matag kilogramo. Ampalaya gibaligya nga P100 hangtud P150/kg, sama nga presyo gikan sa miaging semana, pulang bombay mapalit sa P80 hangtud P150 matag kilogramo ug ang puti nga bombay naa sa P100 hangtud P120/kg.
Sa pikas bahin, gikanayon ni Joedel Leliza, focal person sa Regional Disaster Risk Reduction sa DA-Davao nga wala pay hulga sa El Nino sa Davao Region, kon diin mga mag-uuma nangandam alang sa emerhensiya.
"Wala pa naman El Nino dito (No El Nino) based on the 157th National Climate Forum (of Department of Science and Technology) nasa transition tayo ng La Nina to neutral," pasalig ni Leliza. (ICE)