Gipaabot nga matapos ang pag-ayo sa nangaputol nga underground transmission cables sa National Grid Corporation of the Philippines (NGCP) sa Ouano ug UN Avenues sa dakbayan sa Mandaue karong Mayo 2023.
Ang pagkaputol nakaapekto sa Mactan Electric Company (Meco).
Kini maoy gipahibalo sa NGCP atol sa pakigtigom kauban ni Cebu Governor Gwendolyn Garcia sa Miyerkules, Marso 22, 2023.
Si Garcia nangayo og update sa NGCP sanglit una nang nagplano ang Meco sa pagpausbaw sa power rate gumikan sa additional expense aron lang makahatag og igo ug dugang supply sa isla sa Mactan nga naglangkob sa dakbayan sa Lapu-Lapu ug lungsod sa Cordova.
Sa maong tigom, gimandoan ni Garcia ang mga nangulo sa Meco sa pagpangita og laing power sources aron madugangan ang kapasidad niini samtang naglantaw na ang NGCP nga mag load shedding o rotating brownouts nga makaapektar sa power supply sa Mandaue ug Lapu-Lapu, base sa taho sa Sugbo News.
Subay sa nasayran, ang 138-kilo volt line 2 Cebu-Mandaue underground power line sa NGCP nadaot tungod sa gihimong pagkawot sa contractor sa Department of Public Works and Highways (DPWH) sa kadalanan sa dapit.
Ang gobernador gikatakda nga makigtigom tali sa NGCP ug mga opisyal sa DPWH aron masolusyonan ang maong problema.