Gipasidan-an ni Bise Gobernador Hilario “Junjun” Davide ang mga dunay di maayong tuyo sa paggamit sa iyang ngan sa di maayong binuhatan, nga dili siya magpanuko sa pagpasaka og kaso batok kanila.
Sa labing uwahing pahibalo sa opisina sa bise gobernador, iyang gipasidan-an ang publiko ug mga Sugbuanon nga nagduma sa hotels, resorts ug ubang magpapatigayon nga magmatngon sa mga mangingilad o scammers gamit ang iyang ngan.
Si Davide nipahibawo nga gawas kaniya, walay laing tawo nga iyang gitugotan nga mobarog isip iyang representante bisan paman sa iyang opisina aron nga makahimo og transaksyon sa uban.
“Gipahimangnuan ang publiko sa di pagdawat sa mga kadudahan nga transaksyon gamit ang pangan ni Bise Gobernador Davide,” pahibalo sa buhatan sa bise gobernador.
Kon lehitimo o di ang transaksyon, giawhag niya nga motawag largo sa opisina sa bise gobernador sa (032) 888-2328 local 2015 o (032) 254-4164 alang sa pagkompirmar o verification.