Hatagan og ayuda sa Department of Transportation (DOTr) ang 5,094 ka mga operator ug drayber sa public utility jeepney (PUJ) nga nakibhangan ang kita sa pagpasada tungod sa pagsugod na sa trabaho sa P16.3 bilyunes nga Cebu Bus Rapid Transit (CBRT) project.
Kini ang gibutyag ni Engr. Norvin Imbong, manager sa CBRT, sa Huwebes, Marso 23, 2023, human giaprobahan sa World Bank ang ilang social management plan (SMP) sanglit aminado sila nga apektado ang panginabuhian sa maong sector.
Si Imbong nagkanayon nga adunay libuan nga apektado sa package 1 sa CBRT nga nanukad sa Cebu South Bus Terminal (CSBT) paingon sa Cebu Provincial Capitol ug package 2 nga manukad sa CSBT paingon sa South Road Properties (SRP) ug Cebu Provincial Capitol paingon sa Cebu IT Park.
Ang CBRT management nisubay sa upat ka pillars sa SMP nga gilangkuban sa cooperative formation and strengthening, skills training, alternative livelihood restoration ug social financing sa pagtabang sa operators ug drivers.
Ang kwarta nga magasto alang sa upat ka pillars sa SMP bayran sa pundo gikan sa National Government.
Base sa survey sa social management group sa CBRT, kansang consultant gikan sa University of San Carlos (USC), dunay 2,568 ka operators ug 2,526 ka drivers gikan sa 3,800 ka mga public utility jeepney (PUJ) ang apektado.
Si Imbong nagkanayon nga ilang papilion ang drivers o operators kon asa sa upat ka pillars sa SMP ang ilang ganahan nga pahimuslan.
Apan iyang gihulagway nga posibleng mopili sila sa ikaupat nga pillar sanglit hatagan sila og financial assistance isip bugti sa paghinay sa ilang pamasahero gumikan sa kahuot sa trapiko dala sa construction sa dedicated lanes ug stations sa CBRT.
Ang CBRT adunay subayong pamaagi base sa actual nga pag-ihap sa ilang social management group kon pila ka tuyok sa ilang rota ang mahimo sa tagsa-tagsa ka mga PUJ.
Ang drivers ug operators maoy makabenepisyo sa upat ka pillars, diin adunay pagasubayon nga formula ang CBRT aron sila mabayran sa ilang alkanse sa kita matag adlaw gumikan sa construction.
Ang manager sa CBRT nagkanayon nga ma-release ang financial assistance ngadto sa mga operator ug drivers adto na sa 2024 sanglit moagi pa kini sa proseso sa dili pa nila madawat ang kwarta.
Ang package 1 nga adunay P1.1 bilyunes nga budget gikatakdang mahuman karong Disyembre ug sa 2025 ang gikatakdang full operability sa 21 kilometros nga rota sa CBRT.
Gipadayag sa manager sa CBRT nga dili na unya tugotan ang mga PUJ nga makabiyahe sa rota sa mass transport ug ibalhin sila og lain nga rota aron sila makahatod og pasahero.