Rabacal: Rama pagka-senador?

Rabacal: Rama pagka-senador?

Tinuod ba kining gipadagan nga balita sa mga kapihan nga si Cebu City Mayor Mike Rama maoy kandidato sa administrasyon sa pagka-senador niining umaabot nga mid-term election karong Mayo 2025?

Sumala sa mga tinubdan nga hayloon kuno si Rama sa pagdagan sa Senado aron mahatagan og representasyon ang Kabisay-an. Dugay na tinuod nga way naglingkod sa Senado nga usa ka Cebuano human kang ex-senator Serge Osmena. Gani diha kadtoy grupo nga mitugpo kang Cebu Governor Gwendolyn Garcia sa pagka-senador apan nikagar kini.

Ang nagpakatap niining maong balita kun scenario mipuno nga ang molansar kuno sa pagka-mayor mao si Gob. Garcia. Ambut og unsay katinuoran niini apan daghang mituo kaniya. Ako hinuon nagkatawa sa maong tabi-tabi kay akong nakita nga nakagusto na ang gobernador ug nakasiguro na siya sa iyang gilingkuran og laing usa ka termino nga balig tulo ka tuig. Kon gusto niyang maapil ang Cebu City ubos sa iyang impluwensiya, mahimo man niyang suportahan ang iyang pag-umangkon nga si Bise Mayor Raymond Alvin Garcia pagka-mayor. Angayang masayran nga si Rama maoy Vice President for the Visayas sa Partido Demokratiko Pilipino – Laban (PDP – Laban) nga gipangulohan ni kanhi Presidente Rodrigo Duterte samtang Lakas – National Union of Christian Democrats (Lakas – NUCD) sila si House Speaker Martin Romualdez ug Senador Imee Marcos nga mga suod ni Garcia.

Wa pa ko motuo nga si Mayor Rama uyon sa pagdagan sa usa ka national position. Wa man hinuoy imposible sa politika. Tingalig modawat ang mayor sa tanyag pagka-senador kon ang Malacañang na ang mohangyo kaniya labi na og mominus ang iyang popularity rating. Naa na man hinuon siyay national exposure kay siya man ang chairman sa National League of Cities. Daghan na usab nga mga opisyal sa gobiyerno ug mga dagkong negosyante nga iyang nakahinabi sa iyang pagkampanya alang sa iyang Singapore-like Cebu City.

* * *

Nagsugod na gayud pag-posisyon ang political parties alang sa mid-term elections sa 2025. Pagpangandam usab kini alang sa ilang kandidato sa presidential election sa 2028. Daghan ang nagtuo nga modagan gayud sa pagka- presidente si incumbent Vice President Sara Duterte Carpio ubos sa PDP – Laban tungod sa iyang amahan. Gipaabot nga ang moatbang kaniya mao ang ila ra usab nga higala nga si Senador Imee Marcos ubos sa Lakas – NUCD. Kon mahitabo kini, posibleng dili aktibong moapil sa kampanya si Presidente Bongbong Marcos. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph