Gisuspenso sa House of Representatives sulod sa 60 ka adlaw si Negros Oriental Third District Representative Arnolfo Teves Jr.
Sa plenary session niadtong Miyerkules sa gabii, Marso 22, adunay kinatibuk-ang 292 ka mga magbabalaod ang ningbotar pabor sa House ethics and privileges committee report 472, nga nagrekomendar sa pagsuspenso kang Teves sulod sa 60 ka adlaw tungod sa iyang kapakyas “to observe the norms of conduct and ethical standards expected of public officials.”
Walay negatibo nga boto o abstention.
“His misconduct has adversely affected the dignity, integrity and reputation of his public office and that of the House of Representatives as an institution. This committee cannot countenance such an act by any member of the House,” mabasa sa report.
Si Teves gipahamtangan og ikaduhang labing taas nga porma sa silot nga madawat sa nakasala nga miyembro sa Kamara ubos sa Section 143 sa House Rules.
Samtang gisuspenso, gidid-an si Teves sa pagtambong sa mga sesyon, ug wala’y katungod sa suweldo ug uban pang bayad, luna sa opisina ug uban pang mga pribilehiyo.
Sa iyang pamahayag, si House Speaker Martin Romualdez niingon nga ang ubos nga chamber dili motugot sa sayop nga binuhatan ug kasaypanan sa mga sakop niini.
“Under our leadership, the House of Representatives will never ever countenance any conduct unbecoming of a House member,” matod niya.
Si Teves nagdumili sa pagpauli bisan pa sa iyang expired nga travel authority tungod sa giingong mga hulga sa iyang kinabuhi taliwala sa iyang implikasyon sa pagpatay kang Negros Oriental Governor Roel Degamo.
Giakusahan usab siya sa pagpatay sa tulo pa ka mga indibidwal sa Dumaguete kaniadtong 2019.
Gisalikway usab sa House ang hangyo ni Teves alang sa duha ka bulan nga leave of absence.
Si Teves sa sayo pa niingon nga siya makatambong sa mga sesyon pinaagi sa video conferencing samtang siya nag-apelar alang sa “pagkapatas.”
Ang komite niingon nga ang magbabalaod napakyas sa paghatag og ebidensiya sa pagsuporta sa iyang mga pangangkon nga adunay grabeng nagsingabot nga hulga sa iyang kinabuhi.
Si Presidente Ferdinand “Bongbong” Marcos Jr. niingon sa Miyerkules, Marso 22, nga walay intelligence reports sa mga hulga sa kinabuhi ni Teves.
Kini nga pamahayag sa Presidente gisuportahan nila ni Philippine National Police (PNP) Chief Rodolfo Azurin Jr. ug Armed Forces of the Philippines Chief-of-Staff General Andres Centino.
Gipasalig usab ni Marcos nga luwas si Teves kon makahukom siya nga mobalik. (TPM sa SunStar Philippines)