LTFRB 7 miisyu og ‘special permits’ sa Semana Santa

Dugang sakyanan ang moserbisyo panahon sa tingsakay ning nagsingabot ug paghuman sa pag-obserbar sa Semana Santa.

Ang Land Transportation Franchising and Regulatory Board sa Central Visayas (LTFRB 7) niingon sa Huwebes, Marso 23, 2023, nga nakadawat sila og 80 ka mga aplikasyon alang sa mga special permit aron madugangan ang mga biyahe alang sa Semana Santa.

Si LTFRB 7 Director Eduardo Montealto nitug-an sa SunStar Cebu nga 65 sa 80 ka mga petisyon ang naaprobahan. Sa 65, 35 ka provincial buses ang padung sa habagatang Sugbo ug 30 ka units paingon sa amihanang Sugbo.

Matud pa ni Montealto nga pagpangandam kini sa gipaabot nga pagdagsa sa mga pasahero nga mamauli sa ilang mga probinsiya nunot sa lima ka adlaw nga pahulay atol sa Semana Santa.

Kini nga mga espisyal nga permit mahimong epektibo gikan sa Marso 31 hangtod Abril 17, 2023, si Montealto niingon.

Dugang pa niya nga ang bus companies ug operators pwede gihapon mag-apply bisan lapas na sa Marso 31, 2023.

Gipasalig usab sa opisyal ang publiko nga adunay igong mga bus unit nga maka-accommodate sa mga pasahero sa north ug south bus terminals.

Sa Huwebes, Marso 23, 2023, adunay 350 ka mga operational bus nga nagbiyahe sa mga lugar sa habagatan, samtang 400 ka mga bus unit ang nagbiyahe sa amihanan.

Matod ni Montealto, ang special permit nga giisyu sa regional office dili bahin sa dugang units sa provincial buses, kon dili extension sa ilang kasamtangang mga rota.

Matod niya nga adunay mga bus company nga nihangyo nga lugwayan ang ilang mga rota aron ma-accommodate ang mga pasahero nga moadto sa roll-on, roll-off (Roro) nga mga pantalan alang sa inter-island travel.

Sa laing bahin, hugtan pa sa LTFRB 7 ang ilang inspeksyon sa mga terminal atol sa Semana Santa aron masiguro nga ang mga bus nga mopaingon sa mga probinsya angay sa dalan ug luwas alang sa mga pasahero.

Ang mga operator sa mga bus nga masakpan nga adunay depektoso nga mga unit pahamtangan og silot nga minimum nga P5,000 matag bus, depende sa evaluation.

Gipalugway ni Presidente Ferdinand Marcos Jr. ang Semana Santa, samtang gibalhin niya ang pag-obserbar sa Araw ng Kagitingan ngadto sa Lunes, Abril 10, pagkahuman sa Dominggo sa Pagkabanhaw.

Ang Huwebes Santo ug Biyernes Santo sa Abril 6 ug Abril 7, matag usa, magpabilin nga regular holidays. / EHP