Walay kamatuoran ang pasangil sa usa ka kanhi person deprived of liberty (PDL) nga dunay mga jail officer sa Cebu City Jail (CCJ) Male Dormitory nga motabang og pasa sa mga kontrabando bugti sa dakong kantidad, matod ni Jail Officer 3 Blanche Bation Aliño, information officer sa CCJ.
Dugang niya nga human nila nadawat ang maong taho, nihimo dayon og imbestigasyon ang Bureau of Jail Management and Penology (BJMP 7).
Giklaro ni Aliño nga wala gi-tolerate sa BJMP 7 ang maong matang sa ilegal nga kalihukan.
Dugang niya nga wala usab mohatag og ngalan ang kanhi PDL sa usa ka jail officer nga maoy mopalusot sa mga cellular phone ug ubang mga kontrabando.
Human nagbansiwag sa mga mantalaan sa Sugbo lakip sa Superbalita Cebu, ang tanang CCJ personnel gipaubos dayon sa imbestigasyon.
Si Alyas ‘Berto’, nasulod kanhi sa CCJ, nibutyag sa mga tigbalita labot sa palusot sa mga jail officer.
Nadakpan siya sa Cebu City Police Office (CCPO) sa Simultaneous Anti-Criminality and Law Enforcement Operation (Sacleo) niadtong Enero 20, 2023.
Matod niya, ang ordinaryo nga cell phone nga mapalusot bugti sa kantidad nga P50 - P60,000 ang ibayad ngadto sa mga jail officer.
Kadtong dunay dagkong mga kaso sa ilegal nga drugas maoy moduol sa mga BJMP personnel ug mao usab ang motago sa cell phone kon dunay himuon nga greyhound operation, sumala ni Alyas Berto.
Dili na, matod pa, bag-o sa ilang ahensya ang mga pasangil sa mga nadakpan sa kapulisan nga usa ka inmate ang ilang contact nga gipaagi sa cell phone ang ilang komunikasyon.
Iyang gibutyag nga kon dunay mga balita labot niini, makig-alayon dayon sila sa kapulisan ug sa Philippine Drug Enforcement Agency (PDEA) kon tinuod ba ang pasangil.
Aron pagsiguro nga walay mga kontrabando ang mga PDL nga gihuptan sulod sa ilang selda, matag semana dunay ilusad nga greyhound operation ug matod ni Aliño, wala silay nasakmit nga mga ilegal sama sa cell phone o ba kaha ilegal nga drugas.