Magsugod na ang Kagamhanan sa Dakbayan sa Mandaue sa pagpatukod sa bag-ong government center sa luna sa dugay nang giabandonar nga Cebu International Convention Center (CICC).
Kini subay sa nasabotan nila ni Cebu Governor Gwendolyn Garcia ug Mandaue City Mayor Jonas Cortes sa Marso 23, 2023 atol sa gihimong tigom kauban ang city officials.
Ang tigom gitambungan usab ni Rhoda Movalye sa Commission on Audit (COA 7), subay sa pahibawo sa Sugbo News.
Samtang naghuwat pa ang Kapitolyo ug ang Kagamhanan sa Dakbayan Mandaue sa uwahing reappraisal sa COA alang sa naasoy nga property ug evaluation sa pagbaligya, sugdan na sa Siyudad ang pagpatukod sa maong proyekto.
Sa 2017, ang Kagamhanan sa Probinsya ug Siyudad sa Mandaue nilagda og kasabutan alang sa pagbaligya sa CICC sa balor nga P300 milyunes, lakip ang 3.2 ektaryang luna kon diin natukod ang edipisyo sa may North Reclamation Area.
Giingong nakompleto ang pagbaligya sa 2018.
Sa nasabutan nila ni Garcia ug Cortes, kon ugaling mas mahal o mas taas ang reappraised value sa COA kon itandi sa orihinal nga presyo, ang Siyudad nisaad sa pagbayad sa balanse ngadto sa Kagamhanan sa Probinsya sa Sugbo.
Nasayran nga sa 2019 subay sa audit report sa state auditors, base sa COA circular 2017-003, dunay nakitang disallowance kay wa niagi sa buhatan pila ang pagbaligya.
Ang circular nag-ingon nga ang real estate ug ang ilang mga kalamboan sa local government unit “may be sold to other government or private entities under sealed bids, or by negotiation if a sealed bid has failed as defined herein at a price to be determined by the Committee on Awards.”
Niadtong 2020, girekomendar sa state auditors ngadto sa kasamtangang administrasyon nga paesplikaron ang mga responsable sa transaksyon aron masabtan kon nganong gibalewala ang kasamtangan nga mga regulasyon sa buhatan sama sa pagkinahanglan sa pagpahigayon sa usa ka public bidding una ang pagtugot sa Commission on Audit (COA).
“... review of the reasonableness of the selling price as well as the propriety and conformity of the sale with existing regulations was not conducted,” saysay sa COA niadtong 2020.
Ang CICC gibaligya sa administrasyon ni kanhi gobernador karon Bise Gobernador Hilario Davide III human niigo ang duha ka mga linog.
Giusban pa kini sa super typhoon Yolanda (Haiyan) nga niguba sa edipisyo.