Giawhag sa Land Transportation Franchising and Regulatory Board (LTFRB 7) ang mga operator sa public utility jeepney (PUJ) nga wala pa maka-claim sa ilang Pantawid Pasada Cash Card alang sa ilang fuel subsidy, sa pagkuha na niini.
Si Regional Director Eduardo Montealto Jr. nagkanayon sa Marso 23, 2023 nga moabot pa ngadto sa 535 ka mga cash card ang anaa sa ilang kustodiya nga wala gi-claim alang sa phase 1 ug phase 2 nga pagpanghatag niini sa beneficiaries nga gipasiugdahan sa Department of Transportation (DOTr).
Ang ilang cash card sa 2021 adunay sulod nga P7,200 samtang ang 2022 cash card adunay P6,500 nga gitagana alang sa ilang fuel subsidy gumikan sa pagsaka sa presyo sa gasolina sa maong mga tuig. Adunay kapin o kulang 6,000 ka mga benepisyaryo.
Base sa listahan sa LTFRB 7, adunay 218 ka mga cash card sa phase 1 nga gibahin sa Cebu nga adunay 113, Bohol 90 ug 15 sa Dumaguete City. Samtang sa phase 2, 236 ka mga cash cards ang wala ma-claim sa mga operator gikan sa lalawigan sa Bohol ug 81 ka mga cash card sa samang lalawigan.
Human sa pag-claim sa mga cash card, ang mga operator kinahanglan nga moadto sa branch sa Land Bank of the Philippines aron sila makakuha og pin ug ma-activate ang ilang card ug ilang magamit alang sa pagpatubil.
Ang mga benepisyaryo gipahinumdoman nga magdala og photocopy sa ilang Official Receipt/ Certificate of Registration, valid identification cards nga adunay tulo ka signatures, franchise copy ug alang sa nitaliwan nga operator, ang claimant giawhag sa pagdala sa extrajudicial settlement with waiver of rights/ affidavit of self adjudication, death certificate.