Laing tigbaligya og motorsiklo maproblema human sila napakyas sa pagsunod sa gimando nga tagal sa pagpagawas sa rehistrasyon sa sakyanan.
Si Land Transportation Office VII (LTO7) Regional Director Victor Caindec niingon nga kon madawat na niya ang reklamo sa usa ka buyer, mohimo dayon siya og imbestigasyon sa Gud Moto Trading Inc., sa Dan F. Llamas, Punta Princesa-Labangon branch.
Ang editor sa SunStar Cebu nga si Tito Pagayatan Tan, kinsa nakadawat sa wala marehistrong sakyanan sa motorsiklo, nipalit niadtong Pebrero 25, 2023, nitug-an nga gisultihan siya nga molanat og duha ngadto sa tulo ka buwan ang proseso sa pagparehistro.
Wala siyay nadawat nga updates gikan sa distributor bahin sa pagparehistro sa sakyanan bisan usa ka buwan human sa petsa sa pagpalit.
Bisan siya nakabayad na sa kinatibuk-an, wala gihapon tugti si Tan nga makagamit sa iyang motorsiklo sanglit di pa rehistrado.
Matod sa LTO, ang pagparehistro sa motorsiklo kinahanglang himuon lang sulod sa tulo ngadto sa lima ka mga adlaw sukad sa pagpalit.
Ang upat ka ligid nga mga sakyanan kinahanglang maproseso ang rehistrasyon sulod sa pito ngadto sa 11 ka adlaw.
“The continued practice of motorcycle dealers in releasing unregistered units to clients pose a risk not just to the owners but also affect public safety and security, apart from being patently illegal,” sulti ni Caindec sa SunStar Cebu sa Biyernes, Marso 24.
Matod niya nga ang mga motor dealer nga nipagawas sa dili rehistrado nga mga sakyanan nga de-motor peligro dili lang sa mga tag-iya apan makaapekto usab sa kaluwasan ug seguridad sa publiko, gawas nga kini ilegal.
Gikutlo ni Caindec ang Republic Act (RA) 11235, o ang Motorcycle Crime Prevention Act, nga nagpasabot nga ang saktong pagparehistro sa mga sakyanan kinahanglang himuon sulod sa piho nga mga timeline.
Alang sa mga motorsiklo, ilabi na, matod niya, ang pisikal nga pagbalhin sa pagpanag-iya klarong gipasabot ubos sa balaod.
Gitumbok usab niya ang RA 10883, o ang New Anti-Carnapping Act of 2016, nga nagpatugbaw sa importansya sa pagparehistro sa sakyanan sulod sa gitakdang deadline.
Si Caindec nidugang nga ang rehiyonal nga buhatan sa transportasyon nagpadayon sa pagdakop sa napamatud-an nga mga nakalapas ug paghimo sa administratibo ug judicial nga mga aksyon batok kanila.
Niadtong 2020, gipamulta sa LTO 7 og P300,000 ang usa ka motorcycle distribution company sa Sugbo tungod sa paglapas sa mga regulasyon sa accreditation ug pag-report sa stocks.
Ang SunStar Cebu nibisita sa Gud Moto Trading Inc., branch sa Punta Princesa-Labangon aron kuhaan sa ilang habig apan nidumili.