Buwan natong mga kababayen-an ang Marso kay International Women’s Month man.

Angay palandungan nga ang kababayen-an dunay dako, daghan og importanting papel paglambo sa atong katilingban.

Bisan pa man og di pa 100% patas ang pagtratar sa mga babaye ug lalaki, angay daygon ang mga dagko ug gagmay nga kontribusyon sa kababayen-an gikan sa atong mga lola, inahan, iyaan, sikat o di, nga nakahatag og agianan pagpalambo sa atong katilingban.

Kada Marso matag tuig duna ko’y ipasundayag dinhi sa akong sinemanang kukabildo nga mga babayeng halangdon, sulondon ug dalaygon kay daghang nakab-ot o maayo ang binuhatan.

Karong buwana akong napili-ang isuwat si Kathryna Yu-Pimentel.

Seguro naay uban nato nga nakaila niya isip buotang asawa ni Senador Koko Pimentel apan gamay ra ang nahibalo sa iyang daghang nahimo sa natad sa social work ug negusyo.

Gani siya maoy napiling presidente sa PDP Cares Foundation diin nanguna og panabang sa mga naapektuhan sa kagubot ug terorismo sa Marawi niadtong 2017.

Kahinumdoman, pag-igo sa kalibutanhong epidemya nga Covid-19 niadtong 2020 nga maoy nakaingon sa mga lockdown halos tibuok nasod, siya mismo usa sa naninguha para matabangan ang mga estudyante sa Sorsogon, Cagayan de Oro ug Marikina sa ilang pagtuon online pinaagi sa pagpanghatag og mga gadget (electronic tablets) para makapadayon sa ilang pagtuon.

Sa natad sab sa negusyo, nakapatukod sab ni siya og sikat nga Singaporean restaurant nga gitawag og Tiong Bahru Philippines, aron kitang mga Pinoy makatilaw sab og pagkaong langyaw bisag wa pa kataak ining nasura.

Nagtukod sab ni siya og mga beauty and wellness center nga gitawag og Alpina Lounge and Wellness para sa kababayen-an gamit ang mga modernong teknolohiya sa pagwapa.

Siya ug iyang anak ang kasamtangang nagdala sa AquiLeyna’s Kitchen, usa ka online bakery business.

Si Kathryna simple, maanyag, buotan ug kugihan nga nanay nga angay panaminan.