Giingong sakop sa Crips gang naa sa kritikal nga kahimtang human siya pusila sa lider sa giingong karibal nga Bloods gang alas 12:10 sa kaadlawon sa Biyernes, Marso 24, 2023 sa Brgy. Yati, lungsod sa Liloan, amihanang Sugbo.
Ang biktima giilang si Kenneth Bolhot, 19, ulitawo, taga Brgy. Tilha-ong, lungsod sa Consolacion, naa sa kritikal nga kahimtang human nakaangkon og samad pinusilan sa ubos sa wala nga ilok.
Ang iyang kauban nga si Daryle Seronio, 18, ulitawo, sakop sa Crips gang, motorcycle mechanic, taga Brgy. San Vicente, Liloan, wa naunsa kay mikagar ang armas dihang pusilon unta og apil sa suspek nga giilang si Kiven Libores, hingkod, ulitawo, sakop sa Bloods gang, taga sityo Green Hills, Brgy. Poblacion, Liloan.
Si Libores nagsakay sa motorsiklo sa ilang lider nga si Vincent Buhay, 28, negusyante, taga Purok Mabini, Poblacion.
Si Major Welther Grapa, hepe sa Liloan Police Station nga nahinabi sa Superbalita Cebu, nagkanayon nga ang mga biktima uban sa ilang mga higala nagpaabot og kasakyan aron mamauli.
Kuyog sa duha ang ilang lima ka mga higala nga babaye nga pulos pa mga estudyante ug laing 19 anyos.
Samtang naghuwat og sakyanan, kalit nga ning-abot ang mga suspek nga nagsakay sa motorsiklo nga gimaneho ni Buhay.
Giingong gipusil dayon ni Libores si Bolhot, kinsa naigo sa wala nga ilok.
Dihang natumba na ang biktima, si Seronio na usab unta ang gisunod, apan nikagar ang pusil.
Daling nanibat ang mga suspek paingon sa norte, apan si Buhay nadakpan sa kapulisan mga alas 4 sa kaadlawon sa Marso 24 atol sa hot pursuit operation.
Si Grapa niingon nga gang war ang motibo sa pagpamusil kay ang duha ka mga habig nagbinaharay.
“Kining biktima gipusil na nila sauna. Unya nakalihay man. Nahitabo nagbaharay, gusto nga mobawos,” dugang ni Grapa.
Ang mga suspek gikatahong nagmonitor sa mga lakaw sa mga biktima.
Paglabay sa pipila ka mga oras, si Buhay nipauli sa ilang balay busa nadakpan siya sa kapulisan.
Positibo siyang gitudlo ni Seronio ug sa ilang mga kauban nga mao ang namusil.
Gibutyag ni Grapa nga mihimo sila karon og mga lakang aron mapugngan ang pagdako pa sa away sa duha ka mga habig.
Ning pagsuwat, nagpadayon pa ang hot pursuit operation batok kang Libores. (GPL)