Usa ang patay samtang usa ang angol sa managlahing mga pagpamusil sa Metro Cebu niadtong Huwebes, Marso 23, 2023, ug sa Biyernes, Marso 24.
Usa sa mga biktima kanhi mamarukay, kinsa gipusil alas 6 sa gabii sa Marso 23 sa suspetsadong pusher sa Brgy. Pahina Central, dakbayan sa Sugbo. Ang suspek nagtuong asset sa kapulisan ang biktima nga si Richard Pepito Lingan, 37, taga Brgy. Pasil, dakbayan sa Sugbo. Siya naigo sa wala nga dunggan nga nilapos sa aping.
Ang suspek nga si Gilbert Dakay, hingkod, giingong drug pusher, taga Pasil, dakbayan sa Sugbo, nasikop sa hot pursuit operations.
Si Police Executive Master Sgt. Rogelio Nedamo, Jr., imbestigador sa Carbon Police nga nahinabi sa dySS Super Radyo GMA, niingon nga nadakpan nila si Dakay kay nipauli sa ilang balay.
Ang kapulisan nakasakmit gikan kang Dakay og usa ka 9mm pistol.
Si Dakay nga nahinabi sa sibyaanan niangkon nga siya naglagot kang Lingan.
Matod niya kauban sila kaniadto nga mamarukay og drugas.
Siya nipasangil nga giunay siya pagpadakop sa kapulisan hinungdan nga napriso siya niadtong 2021.
Human siya nakagawas sa prisohan, iyang nahibaw-an nga ang biktima gihimong asset sa kapulisan.
Dihang naglakaw ang biktima sa may dan Magallanes, habig sa Brgy. Pahina Central, iya kining gipusil. Si Lingan naa sa ospital.
NAMATAY
Samtang namatay diha-diha ang usa ka e-trike driver human pusila sa wala pa mailhing gunman ala 1:20 sa kaadlawon sa Biyernes, Marso 24 sa Sitio Atisan, Brgy. Cansojong, Talisay city.
Ang biktima giila nga si Rodolfo Apolinario Jr., alyas Lolot, 33, taga Brgy. V. H. Garces St., Brgy. Cansojong, sa nahisgutang siyudad.
Giingong lalaki nga nagsul-ob og kalo, nagsunod sa biktima dayon wala magdugay ang mga tawo sa dapit nakadungog og tulo ka mga buto sa pusil.
Ang biktima, dihang gihiling sa mga medical personnel sa ambulansya, patay na. (GPL, BBT)