Dugay nang nalantawan ang isyu sa kakuwang sa igong supply sa tubig sa Metro Cebu sa umaabot nunot sa pagburot sa populasyon ug kapaspas sa kalamboan sa ekonomiya.
Apan ang maong problema sama sa napadaplin tungod sa pagtumaw usab sa daghang mga isyu ug ubang mga hagit sama sa pandemiya sa Covid-19 ug African swine fever (ASF).
Ug ang isyu bahin sa tubig masentro og balik kon masinati ang kakuwang tungod sa huwaw o grabeng kainit sa summer. Mangumusta kita sa tinubdan ug supply sa tubig sa Metro Cebu?
Nideklarar na ang Philippine Atmospheric, Geophysical and Astronomical Services Administration (Pagasa) sa Martes, Marso 21, 2023, sa pagsulod sa summer o panahon sa ting-init nga molungtad hangtod sa Mayo.
Ang Pagasa nagkanayon nga nag-ung-ong ang El Niño phenomenon o huwaw.
Samtang, ang nag-unang lokal nga tig-apud-apod sa tubig nga Metro Cebu Water District (MCWD) nagdepende sa ilang tinubdan ug independenteng bulk suppliers.
Kon magsalig sa kaugalingong tinubdan ang MCWD, kwestiyonable gihapon kon mograbe ang kainit hinungdan sa pagkunhod o hubas sa dam, deep wells ug bisan ang tubod sa bukirang dapit.
Bahin sa bulk supplier, mitumaw usab ang isyu ning ulahi bahin sa presyo sa tubig gikan sa Luyang River, lungsod sa Carmen. Sumala sa mga pagtuon, lisod ang tinubdan sa tubig sa Metro Cebu tungod sa kaubos sa water level.
Nasayran nga ang MCWD nangita og alternatibo sama sa pagkuha og tubig sa dagat pinaagi sa desalination. Maayong plano apan taudtaod pa kini matuman. Karon ang panginahanglan.
Taliwala sa kabalaka, isip konsumidor, magpakabana kita sa pagdaginot sa tubig kay dako na kini og matabang.
Manawagan usab kita sa mga opisyal sa kagamhanan alang sa seguridad sa usa sa mga nag-unang batakang panginahanglan aron mabuhi, ang tubig.