ungod sa kapiit sa atong schedules, wa ta maka cover sa WBO Asia Pacific Youth junior flyweight championship fight tali nila ni John Paul Gabunilas sa ARQ Boxing Stable ug Wandi Priman Hulu sa Indonesia.
Apan sigon sa atong panukiduki, gi knockout diay ni Gabunilas si Hulu sa ikaunom ka round. Wa gyud ko masipyat sa akong panglantaw. Naa tanang bintaha ni Gabunilas, ang giilang “Angas Ng Cebu.”
Taas, experience ug kusog batok sa bag-o pa lang na professional fighter. So, congratulations, John Paul ug congrats usab Boss Jason Arquisola.
Morag temporaryong napakgang ang kahinam sa mga boxing fans sa tibuok kalibutan human ianunsiyo nga dili una ihinayon ang away ni Japanese boxing superstar Naoya Inoue batok sa undefeated usab nga si Stephen Fulton Jr. nga taga Philadelphia, USA.
Ang duha gikatakda unta nga magsinukliay sa ilang mga kumo karong Mayo 7, 2023 Yokohama Arena sa Japan, hometown ni Inoue. Apan, matod pa, nga na injured si Inoue atol sa iyang training camp ug maoy hinungdan nga nangayo sila og postponement sa maong away.
Hinuon wala pay petsa nga gikatakda sa pag-uswag niini sanglit wa pa matino ang gidugayon sa pagpaalim sa maong injury.
Si Inoue (24-0, 21KOs), kinsa nahimong undisputed champion human niya mahiusa ang tanang mga titulo sa bantamweight division - WBA, WBC, WBO ug IBF - tulo ka buwan ang nakalabay, misaka ngadto sa jr. featherweight division aron suwayan paglangkat ang WBC ug WBO title ni Fulton (21-0, 8KOs).
Actually, gikonsiderar unta ni Fulton nga mosaka ngadto sa 126 lbs. (featherweight division) aron makig rematch ni Brandon Figueroa human niya pildiha si Daniel Roman.
Pero sa uwahing anunsiyo, daw og sa taodtaod pa nga magpaabot si Fulton kon kanus-a gyud hingpit nga maka recover si Inoue.
Makapahinumdom man sab ni nako katong napublikar na unta nga away ni Inoue batok ni Filipino champion Johnriel Casimero niadtong Abril 25, 2020 apan sa kalit lang gi-postponed.
Girason sa kampo ni Inoue mao ang pagkatap sa coronavirus. Gihugonhugon nga sa Hulyo o Agusto kini giuswag apan wa na usab mahinayon tungod sa US visa problem ni Inoue kay adto man sa US ipahigayon ang away.
Unya mao na lay nahibaw-an nga dihang nakakuha na og visa si Inoue, lain na hinuon ang iyang gikontra. Masabot nga daw og sa naglikay si Inoue ni Casimero. Siguro dunay nakita ang kampo ni Inoue nga nameligro ang ilang batos.
Gihugonhugonan karon nga posibling adunay rematch nga mahitabo tali ni Charly Suarez sa Philippines ug Paul Fleming sa Australia.
Mora man gud og naglungot-lungot ang Team Fleming sa dihang wa sila katuo nga ma knockout ang ilang pambato sa ika-12 nga hugna sa away nga tulo ka regional titles nakataya niadtong Marso 15, 2023.
Dako ra ba unta og labaw si Fleming sa scorecards sa tulo ka mga judges nga sama kaniya pulos usab Australiano.
Pero wa magsilbi ang ilang pabor-pabor kay pipila ka segundos ang nahabilin sa away, maayo mang pagkasakupo sa kumo si Fleming (28-1) ug natumba.
Si Suarez (16-0) mao na karon ang naghupot sa IBO Intercontinental, WBA Oceania ug WBC Asian Boxing Council sa super featherweight division.
Ang nakanindot kay kon dunay rematch hayag ang posibilidad nga anhi kini ipahigayon sa Pilipinas. Bawos-bawos kay sa dihang sila pa ang champion didto man sa ilaha ang away unya ilaha pud ang judges.
Kon anhi sa Pilipinas aw, Pinoy sab ang judges.