Kaadlawon pa lang sa buntag, bisan sa katugnaw ug kabugnaw sa tubig, sayo ming nangaligo sa akong asawa aron wa pay alas 5 sa buntag niadtong Marso 17, toa na mi sa Pier 3 aron mosakay og barko padung sa Bohol.
Tuod man, pag-abot namo sa pier, daghan nang mga motorcyclist nga mangapil sa Bohol Loop nga nag-una namo og abot. Sobrang excited sa trip.
Nilarga og pasado alas 7 sa buntag ang barko sa Lite Shipping ug nidunggo mi mga duha ka oras ang nakalabay. Pagdunggo pa lang namo sa lungsod sa Tubigon, visible na kaayo ang bunok sa uwan sa kabukiran.
Inay moadto mi agi sa Calape-Loon padung sa Tagbilaran, didto mi sa interior, sa Catigbian. Ako tong gituyo, nga wa nako pahibaw-a ang akong asawa, aron akong matan-aw kon maanindot ba nga biseklitahan ang dapit.
Maanindot kaayo, bisan dunay portions nga medyo tungason, kay way hapit mga sakyanan nga mangagi tungod kay di man siya main highway. Ang mga talan-awon maanindot usab kaayo. Magkabugnaw usab ang huyohoy sa hangin ug presko pa kaayo.
Di ka mabalaka nga mobiyahe kay makaagi ka man og mga lungsod sa interior. Apan alang nako, kuwang ra ni ang gilay-on kon mosuroy ka sa Bohol.
MAS LAYO
Mas maanindot kon gikan sa Tubigon, molahos ka ngadto sa Carmen agi sa Sagbayan. Panington ka sab og bugbog og sinikad kay padung sa Sagbayan, tungason man na.
Amo ning nasikad nga way hunong human sa linog sa 2013. Naapil ning mga dapit sa among rota sa Bohol Loop.
Mahimo rang adto ka molahos sa Jetafe dayon padung sa Trinidad paingon sa Carmen.
Nipahinay mi sa pagpadagan sa among motorsiklo aron lantawon ang maanindot nga mga talan-awon. Among naagian ang lapad nga kahumayan nga ingon sa bawod tan-awon ang berde nga kaumahan.
Makita ni sa duha ka sides sa karsada kay daghan sa portions sa karsada sa interior sa Bohol milagbas sa kaumahan.
Wa kaayo namo ma feel ang kainit tungod tingali sa mabugnaw nga huyohoy sa hangin sa kabukiran.
Samtang nagpadagan ko sa motorsiklo, nag-imagine ko sa pagsikad sa mountain bike subay sa ilang kadalanan sa kabukiran.
FOREIGNERS
Unsa kanindot suroyan sa Bohol samtang magbiseklita? Maanindot kaayo. Ang kakahoyan nga ana ra daplin sa kadalanan. Kon kapoy ka na kaayo, mahimo rang mopasilong sa dagkong mga kahoy daplin sa highways.
Nakasugat mi og foreigners nga nagbiseklita. Ang wa nako malimti mao ang usa ka babayeng Caucasian (white) nga ang set-up sa iyang MTB alang sa bike touring. Sa masigka kilid sa likod naa ang duha ka dagkong bike bags.
Kalma ra kaayo siyang nagsikad ug base sa porma sa iyang lawas ug medyo nasunog na nga panit, klaro nga anad na siya sa pagsikad.
Wa siya masayop ug uban pang foreigners sa pag bike tour sa Bohol tungod kay mas luwas, mas maanindot ang mga talan-awon sa lalawigan tungod kay mas accessible ang ilang interior tungod sa hapsay, lapad nga mga karsada.
Sa Cebu? Delikado.