Miabli og balik ang Colon night market sugod niadtong Biyernes, Marso 24, 2023, alas 6:00 sa gabii hangtod sa alas 2:00 sa kaadlawon.
Sama sa night market sa miaging Disyembre 2022 hangtod sa Enero 2022, abli kini matag Biyernes, Sabado ug Dominggo. Ning higayona molungtad kini hangtod sa katapusan sa Abril.
Atol ning pag-obserbar sa Ramadan, adunay espisyal nga bahin alang sa halal nga mga pagkaon ug tradisyonal nga mga produkto sa Muslim ug sa ilang kultura.
Susama sa unang lokasyon ang gigahin alang sa night market, gikan sa dalan Colon, eskina Dalan Osmeña (atubangan sa Mcdonald’s Colon) hangtod sa eskina sa dalan Mabini.
Ang Ramadan night market nagsilbi nga tribute sa Muslim community, diin 70 porsiyento sa vendors nga mosalmot sa night market mga Muslim, matod ni Cebu City United Vendors Association president Maria Pino.
Dugang ni Pino, usa ka lugar nga nahimutang duol sa Jakosalem St. (atubangan sa Gaisano Main) ang igahin alang sa mga halal nga pagkaon.
Andam usab ang makeshift prayer room tungod kay ang mga Muslim vendor kinahanglan nga mag-ampo lima ka beses sa usa ka adlaw tungod sa Ramadan, ingon ni Pino.
Si Ijodin Mamacol, executive director sa Office of the Muslim Affairs and Indigenous Cultural Communities (OMAICC), niingon nga ang eskedyul sa mga kalihukan nga nagpasiugda sa mga tradisyon ug kultura sa mga Muslim ipahibalo sa dili madugay.
Ang Cebu City Transportation Office (CCTO) nipasalig nga adunay traffic enforcers ug alternatibong mga rota nga ibutang aron makatabang sa mga drayber ug mga sumasakay. (JJL)