Kapin sa 77 milyunes ka mga Filipino ang nagparehistro alang sa ilang national ID, diin kapin sa walo ka milyon usab ang nakaabli og bank account sa unang higayon pinaagi sa colocation strategy sa mga registration center sa usa ka banko.
Ang Philippine Statistics Authority (PSA) nitaho nga niadtong Marso 10, 2023, kapin sa 77.3 milyunes ka mga Filipino ang malampusong nakarehistro sa Philippine Identification System (PhilSys).
Gidugang niini nga kapin sa 25.9 milyunes ka physical ID cards (PhilIDs) ang na-deliver, samtang kapin sa 27.14 milyunes ka Filipino ang nag-claim sa ilang ePhilIDs sa registration centers o ubang distribution access points, lakip na ang ilang mobile device diin ang ePhilIDs mahimong ma-download.
Ang ePhilID mao ang digital version sa PhilID nga giimprenta sa papel nga magamit na sa mga rehistradong Filipino samtang naghulat sa paghatod sa ilang PhilID nga giimprinta sa Bangko Sentral ng Pilipinas (BSP).
Ang PhilSys mao ang sentro nga plataporma sa pag-ila sa gobyerno alang sa tanang lungsoranon sa Pilipinas ug mga langyaw nga residente sa Pilipinas. Bisan ang bag-ong nahimugso nga mga bata mahimong marehistro.
Sumala sa census sa tuig 2020, ang Pilipinas adunay populasyon nga 109,035,343 ka mga tawo.
Gawas sa pag-ila sa mga residente, gitabangan usab sa PhilSys ang gobyerno aron mahatagan ang milyon-milyon ka mga Pilipino og pormal nga access sa serbisyong pinansyal.
Sa dili madugay, makahimo usab ang gobyerno sa pagtangtang sa mga ghost beneficiaries sa Pantawid Pamilyang Pilipino Program, ang cash transfer program sa nasod alang sa labing kabos sa mga kabos.
Uban sa financial inclusion nga usa sa mga tumong sa PhilSys, ang PSA nakigtambayayong sa state-owned Land Bank of the Philippines (Landbank) alang sa usa ka colocation strategy nga nagtugot sa PhilSys-registered nga mga indibidwal sa pag-abli sa transaction accounts sa PhilSys registration centers.
“This strategy allowed 8.4 million Filipinos to be onboarded to financial inclusion, 5.8 million of whom were able to open their first transaction accounts, which were used in 108,473 recorded transactions amounting to P275.8 million,” ang PSA nagkanayon sa usa ka pamahayag.
Ubos sa istratehiya, ang mga unbanked adult Filipinos gihatagan og banking card nga dili na kinahanglan nga mohimo og pasiunang deposito. Wala usab kinahanglana ang pagpadayon sa balanse.
Ang mga nagparehistro sa PhilSys mahimong mogamit sa Landbank prepaid cards sa pag-withdraw sa cash, pagpamalit ug pagbayad sa mga bayronon online, ug bisan sa pagdawat sa subsidy sa gobyerno sa digital, matod sa Landbank. (CTL)