Ang naandan ug tinuig nga kalihukan sa Sugat Kabanhawan festival sa lungsod sa Minglanilla matag Semana Santa hingpit nang ibalik sa local government unit (LGU) nga naapektuhan tungod sa coronavirus disease 2019 (Covid-19) pandemic.
Kini ang gipahibawo ni Minglanilla Mayor Rajiv Enad sa interview sa mga sakop sa media bag-ohay lang.
Sa pag-igo sa pandemic niadtong 2020, wa kini mapahigayon ingon man sa 2021 tungod sa kataas sa mga kaso sa Covid-19.
Niadtong 2021, si kanhi mayor Elanito Peña nikanselar sa festival tungod kay wa pa masugdi ang pagpamakuna batok sa Covid-19.
Nabalaka siya sa panglawas sa mga lumolupyo hinungdan nga kini gikanselar.
Niadtong 2022, duna man tuoy mga kalihukan, apan gilimitahan ang mga ningtambong ug wa say street dancing.
Apan karong tuiga, matod ni Enad nga ilang ibalik ang tanang naandang mga kalihukan sa wa pa ang pandemic.
“We will celebrate of course the Sugat Kabanhawan which is the yearly tradition ever since as I could remember. Sugat Kabanhawan sa pagkabanhaw sa atong Ginoo. We will not shy away from celebrating and we will march our yearly tradition as well as the dancing,” matod ni Enad.
Alang kaniya mas labing importante nga mahandom ug masaulog sa mga Minglanillahanon ang tinuig nga kalihukan.
Ang mga kalihukan magsugod sa Abril 2, 2023 pinaagi sa usa ka concert.
Matag gabii dunay ipahigayon nga mga kalingawan sama sa Minglanilla Got Talent, singing contest, karo display, dance contest, acoustic band concert ug drama.
Ang mga kalihukan matapos sa Dominggo, Abril 9, Pasko sa Pagkabanhaw. Sa mao nga adlaw, ipahigayon ang Sugat sa alas 2 sa kaadlawon.
Sundan kini sa games and amusement sa alas 6 sa buntag.
Sa alas 4 sa hapon ipahigayon ang street dancing.
Sa gabii sa Dominggo, ipahigayon ang Festival Queen, Ritual Showdown ug tapuson sa grand fireworks display.
Gitataw sa mayor nga wala sila nakig kompetensiya sa ubang mga kalungsoran kay kada dapit adunay kaugalingong estilo sa pagselebrar.