Gipaabot nga moluag ang kadalanan sa dakbayan sa Sugbo nga maagian sa rota sa Cebu Bus Rapid Transit (CBRT). Nganong moluag man nga naghuot na man gani ang trapiko sa mga karsada sa pagsugod pa lang sa maong proyekto?
Moluag kay matod pa ni Engr. Norvin Imbong, manager sa CBRT, dili na man unya tugotan ang mga public utility jeepneys (PUJ) nga makabiyahe sa rota sa maong mass transport system.
Makapamasahero gihapon sila apan adto na lang sila sa mga rota nga di maagian sa CBRT. Ang mga apektadong PUJ igo na lang nga mohatod ug mokuha sa mga pasahero ngadto sa estasyonan sa CBRT.
* * *
Makibhangan ang kita sa 5,094 ka mga operator ug drayber sa PUJ tungod sa pagsugod na sa trabaho sa P16.3 bilyunes nga CBRT project. Subay sa survey sa social management group sa CBRT, apektado ang 2,568 ka operators ug 2,526 ka drivers sa 3,800 ka mga PUJ nga nagbiyahian karon.
Apan matod pa ni Imbong, hatagan sila og ayuda sa Department of Transportation (DOTr) subay sa ilang social management plan (SMP) nga giaprobahan na sa World Bank. Ang pundo alang niini gikan sa gobyerno nasyonal.
Dunay upat ka pillars ang ilang SMP nga gilangkuban sa cooperative formation and strengthening, skills training, alternative livelihood restoration ug social financing sa pagtabang sa operators ug drivers.
* * *
Matod pa ni Imbong, ilang papilion ang mga driver ug operators kon asa sila sa upat ka pillars sa SMP. Apan hayan maoy pilion ang ikaupat, ang social financing, kay hatagan man sila og financial assistance bugti sa kibhang sa ilang kinitaan nunot sa kahuot sa trapiko dala sa construction sa CBRT.
Si Imbong miingon nga ma-release ang financial assistance ngadto sa mga operator ug drivers adto na sa 2024 sanglit moagi pa kini sa proseso sa dili pa nila madawat ang kwarta.
Ang package 1 sa CBRT nga adunay P1.1 bilyunes nga budget ug gisugdan nag trabaho gikatakdang mahuman karong Disyembre ug sa 2025 ang gikatakdang full operability sa 21 kilometros nga rota sa CBRT.