Brownlee, Fajardo, mangulo sa PH pool

Pangulohan ni naturalized player Justin Brownlee ug sa Sugboanong higante nga si June Mar Fajardo ang 28-man pool nga pilian sa Gilas Pilipinas alang sa 32nd Southeast Asian Games nga ipahigayon karong Mayo 5-17 2023 sa Cambodia.

Gibutyag sa Samahang Basketbol ng Pilipinas (SBP) kining maong listahan nga ilang gisumiter ubos sa Entry By Name (EBN) category ngadto sa Philippine Olympic Committee (POC).

Naa sab sa listahan ang mga kauban ni Brownlee sa Brgy. Ginebra Gin Kings nga sila si Scottie Thompson, Japeth Aguilar, Jamie Malonzo, Christian Standhardinger, Stanley Prongle Jr. ug Jeremiah Gray.

Ang mga kauban ni Fajardo sa San Miguel Beermen nga sila si CJ Perez, Marcio Lassiter, ug Chris Ross apil sab.

Ang ubang mga naa sa listahan mao sila si Roger Pogoy, Calvin Oftana, John Paul Erram, ug Mikey Williams sa TNT Tropang Giga, Chris Newsome, Raymond Almazan, ug Aaron Black sa Meralco Bolts, Kevin Alas ug Brandon Ganuelas-Rosser sa NLEX Road Warriors, ug Arvin Tolentino sa NorthPort Batang Pier.

Gawas sa mga magduduwa sa Philippine Basketball Association (PBA), aduna sab college players nga naapil sa listahan ug kini mao sila si Mason Amos, Kevin Quiambao. Jerom Lastimosa, Deschon Winston, Benjamin Phillips III, Michael Phillips, ug Ariel John Edu.

Sa nangahisgutang mga magduduwa, naglaom ang Pilipinas nga mabawi ang basketball gold medal ning matag duha ka mga tuig nga kompetisyon.

Sa miaging edisyon sa kompetisyon nga gipahigayon sa Vietnam, wala damhang nailog sa Indonesia gikan sa Pilipinas ang gold medal.

Gigunitan sa Pilipinas ang basketball gold gikan pa niadtong 1997 una kini nailog sa Indonesia.

“That moment is upon us, and we’re not leaving any stone unturned in our overall bid to regain basketball grloy in our region,” matod ni SBP president Al Panlilio nga napatik sa www.pba.ph. (ESL)