MIDANGOP sa Sta. Ana Police Station ang usa ka ulitawo human nga na-scam siya sa iyang pagpalit og cellphone online.
Gilayong nagpa-blotter si Jayson (bansagon gitago), 31-anyos, usa ka call center agent ug nag-abang og boarding house sa Barangay San Antonio, Agdao District, Davao City human nga na-scam siya sa iyang gipalit nga cellphone kay ang miabot kaniya usa ka barita nga sabon kun detergent bar.
Saysay ni Jayson sa Sta. Ana police nga iyang na-order ang cellphone online ug ang seller niini dili mosugod og cash on delivery (COD) busa napugos siya sa pagbayad daan.
Giingon nga mibayad na lang sab siya human nga makuha niya ang 50 percent nga discount gikan sa orihinal nga presyo nga P15,590 maong dali kining mipadala og bayad pinaagi sa mobile cash remittance.
Sumala sa biktima nga mipadala dayon siya og P7,795 sa seller nga giingon taga Marikina City sa Metro Manila, uban sa kalipay nga free shipping na kini.
Naghulat suma pa ang biktima og lima ka adlaw, diin miabot ang iyang parcel pinaagi sa usa ka sikat nga global logistics service provider.
Dihang iya kining giablihan, usa ka barita nga sabon ang sulod sa karton, maong iya dayon nga gikontak ang seller apan dili na kini makontak.
Usa ka leksiyon ang napupo sa biktima sa iyang nadangatan diin igo na lang siyang nagpa-blotter sa nahitabo kaniya.