Gisugat og kapildihan si Los Angeles Lakers superstar LeBron James sa iyang pagbalik gikan sa 13 ka mga duwa nga pagpalta batok sa Chicago Bulls, 118-108, ning Lunes, Marso 27, 2023 (PH time), sa National Basketball Association (NBA).
Si James, kinsa maoy all-time scoring leader sa NBA, gilista nga kuwestiyunable ning kombatiha apan nakadesisyon kini nga moduwa gumikan kay sa iyang pamati, hingpit nang naalim ang angol sa iyang tuong tiil nga nagpadaplin kaniya sulod sa usa ka buwan.
“I felt confident in the workouts that I had this week,” matod sa kanhi four-time MVP.
“And the day after the workouts, when I woke up, stepped out down off the bed, I could possibly play today. And after my workout early before the game today, I knew I could play.”
Sa ikaduha pa lang nga higayon sa iyang 20 ka mga tuig nga pagduwa, nikombati si James nga dili usa ka starter.
Sa iyang pagsulod sa tunga-tungang bahin sa 1st quarter, napamatud-an dayon ni James nga andam na siyang mobalik ug napangulohan niya ang Lakers pinaagi sa iyang 19 puntos.
“You could see him getting his rhythm, his timing, his finishes, all of that,” matod ni Lakers coach Darvin Ham kabahin ni James.
“He's a savvy veteran, one of the greatest ever to do it, so it's not going to take all that much."
Aduna pa’y laing lima ka mga magduduwa ang Lakers nga ningmugna og dobleng numero nga mga puntos.
Kini mao sila si Malik Beasley (18), Troy Brown Jr. (18), Dennis Schroder (17), Anthony Davis (15), ug Austin Reeves (13).
Taliwala niini, nakontrolar gihapon sa Bulls ang kombati gikan sa 2nd quarter hangtod sa katapusang gutlo.
Ang Bulls gipangulohan ni Zach LaVine pinaagi sa iyang 32 puntos, nidugang og 17 si DeMar DeRozan, nihatag og 13 si Coby White, nitunol og 12 si Andre Drummond samtang niamot og 10 si Patrick Beverley.
Sa kadaugan, nagpabilin ang Bulls sa ika-10 nga bahin sa Eastern Conference dala ang 36-38 nga rekord.
Ang Lakers, nga ningkombati nga wala ang pambato nilang pointguard nga si D’Angelo Russell sa ikaduhang higayon, natagak sa ikasiyam nga puwesto sa Western Conference bitbit ang 37-38 nga baraha. (AP)