Mokabat sa 19 ka mga babaye ug upat ka mga lalaki malampuson nga na rescue sa mga sakop sa Department of Social Welfare and Services (DSWS) sa Kagamhanan sa Dakbayan sa Sugbo uban sa Abellana Police Station sa Cebu City Police Office (CCPO) pasado ala una sa Lunes sa kaadlawon, Marso 27, 2023 sa Dalan Juana Osmeña sa Brgy. Kamputhaw.
Matod ni Police Major Nolan Tagsip, hepe sa Abellana Police Station, nga sila nakadawat og sunodsunod nga mga tawag sa telepono labot sa presensya sa mga babaye nga magtindogtindog daplin sa karsada sa Juana Osmeña ug giingong mangdilihensya sa mga langyaw ug lokal nga turista.
Dali nila nga gisusi uban sa mga sakop sa City Intelligence Unit sa CCPO ug nasuta nga tinuod ang maong impormasyon.
Nakig-alayon dayon sila sa Kagamhanan sa Dakbayan sa Sugbo ug ilang malampuson nga na rescue ang maong mga babaye.
Kalapasan sa City Ordinance 1631 kun Anti-Mendicancy Law ang ilang atubangon.
Sila kasamtangan nga gipahimutang sa Cebu City Shelter Samaritan’s Rest House nga naa nahimutang sa South Road Properties aron ipaubos sa intervention sa DSWS.
Matod ni Tagsip nga makadaghan na sila nakadawat og reklamo labot sa presensya sa maong mga babaye sa General Maxilom Avenue ug sa Juana Osmeña nga manghingi sa mga langyaw.