Managtiayong Indian national nga tigpatanto gipamusil patay sa Sabado sa gabii, Marso 18, apan Dominggo na sa hapon napalgan sa ilang pinuy-anan sa Sitio Ilaya, Brgy. Tuburan Sur, Danao City, amihanang Sugbo.
Ang mga biktima giila sa kapulisan nga sila si Sukhwinder Singh Khatkaher, 42, ug asawa nga si Kirndeep Kaur Khatkaher, 32.
Ang mga biktima nakaangkon og mga samad pinusilan sa nagkadaiyang parte sa kalawasan.
Si Police Lt. Col. Fortunato Ecle, Jr., hepe sa Danao City Police Station nga nahinabi sa Superbalita Cebu, nagkanayon nga duna na silay person of interest sa kaso.
Duna silay nakuhang footage sa closed circuit television (CCTV) camera sa gunman uban sa mga biktima.
Ning pagsuwat, nagpadayon ang ilang hot pursuit operation batok sa gunman nga ilang gihulagway nga kaila ra sa magtiayon.
Ang gunman niabot sa panimalay sa mga biktima base sa footage.
Nag-estorya ug nagtagay ang bana ug gunman gawas sa balay mga alas 7 pasado sa gabii sa Sabado dihang kalit kining nipusil sa bana ug gisunod ang asawa.
Di tulis ang motibo kay intact ang kwarta sa magtiayon, apan nasayran nila nga ang gunman dako og utang. (GPL)