HUMAN sa kamatayon sa usa ka 49-anyos nga swimming coach atol sa IRONMAN 70.3 swimming leg, ang lokal nga panggamhanan sa Davao kasamtangang nagtagad sa maong insidente aron mahatagan og hinanaling ayuda ang mga nabilin nga pamilya.
Adlaw'ng Dominggo, Marso 26, 2023, atol sa IRONMAN 70.3 swimming leg, gikataho nga namatay ang usa sa mga coach niini.
Sumala ni City Sports Development Division Head Mikey Aportadera nga anaa na kanila ang impormasyon sa nahitabo ug nakatakda nga matabangan kini sa lokal nga panggamhanan sa Davao.
"Gahapon pa lang (Dominggo, Marso 26) we already required some of the safety cluster to provide us with the matters of information," ingon ni Aportadera human sa flag-raising ceremony sa City Hall, kagahapon.
Matud ni Aportadera nga ang kagamhanan sa dakbayan, uban sa mga organizer sa IRONMAN 70.3, miseguro nga una ug labaw sa tanan makatabang sa pamilya sa namatay.
Ang siyudad nihatag usab og tabang alang sa paglubong nga gitakda kagahapong adlawa, Lunes, diin ang namatay, usa ka Muslim, ilubong sumala sa kostumbre sa Islam.
Gipaabot usab sa buhatan sa mayor sa dakbayan ang hinabang ngadto sa 18-anyos nga lalaki kinsa nakaangkon og grabeng mga samad sa dihang nabanggaan og bike sa Panabo City, Davao del Norte.
Dugang ni Aportadera nga ang siyudad sa pagkakaron nakig-alayon sa Panabo medical sector aron mamonitor ang kahimtang sa ulitawo.
Si Aportadera miingon nga sa kalibutan sa grabe nga mga dula, ang mga pagkamatay ug pagkaangol dili malikayan.
Siya niingon nga ang miaging IRONMAN 70.3 triathlon races nga gipahigayon sa lain-laing bahin sa kalibutan niresulta sa mga nangamatay ug mga samad nga dili lahi sa duha ka insidente niadtong Dominggo.
Apan ang pagkamatay sa beteranong manlalangoy ug atleta nakahatag og mga pangutana nga kinahanglang tubagon, suma sa opisyal.
"The races before in different countries around the world, basta IRONMAN, there are some fatalities and some injuries," ni Aportadera.
"But as a city, we would not want that to happen. Nobody did. Amoa lang, we will look into the matter. Amo lang gyud kuhaon tanang angles gyud para at least there is clarity for what happened," dugang niya.
Matud ni Aportadera nga ang mga medical responders nakahimo sa pag-resuscitate sa langoy ug gidala sa tambalanan ang biktima diin suma sa usa ka sakop sa pamilya nga giatake sa kasingkasing ang coach sa manlalangoy.
Samtang, lain pang matang sa hinabang alang sa namatyan nga pamilya ang giandam na sa siyudad. (PR)