SA ikaduhang sunodsunod nga higayon, nakatilaw na sab og laing kapildihan ang Smart Gilas-RP team, ning higayuna pinaagi sa overtime batok sa Astana Tigers sa Kazahkstan, 71-77, kagahapon sa FIBA Asia Champions Cup sa Gharaffa Indoor Stadium sa Doha, Qatar.
Sukwahi sa ilang dakong kapildihan sa premiro nilang tahas batok sa Al Rayyan sa host Qatar, 68-85, ang mga Pinoy nakahatag sab gyud og saktong kombati ning higayuna.
Ang 8-2 nga rally sa mga Pinoy nga gituldokan og three-point shot ni Aldrech Ramos maoy nakapugos og overtime, 61-61.
Gamit ang ilang bintaha sa gidak-on ug gitas-on, nagpakalig-on ang Kazakhs sa overtime alang sa ikaduha nilang kadaugan sa Group A, nga gihulagway nga Group of Death sa torneyo.
Sa sunod nilang tahas, ang Gilas makigharong sa mas tag-as sab nga Iranian squad.