Usahay makalagot ning mga polis, labi na gyod tong mga abusado. Pero di pod kalikayan nga usahay sab, makaluluoy sab sila, labi na tong mga buotan.
Ngano man?
Adunay kapulisan karon nga “gi-relieved” samtang padayon pa ang paglutos sa mga mamumuno ni kanhi gobernador Roel Degamo sa Negros Oriental, unya ibutang sila sa gitawag og Character and Aptitude Development Training Program nga mokabat og 30 ka adlaw.
Sa badlungon nga mga polis, husto ra ang maong disiplina.
Pero sa mga wala magpabadlong, luoy pod intawon kay nadamay lang.
* * *
Kasagaran, ang kapulisan sama ra sa casual workers nga nagtrabaho sa gobiyerno.
Kinahanglan sila magpaituy-itoy o magpaluoyluoy sa ilang mga amo o sa mas labaw pa kanila, labi na gyod sa mga pulitiko. Mao kini gitawag og magpa-sipsip gyod aron di mabutang sa alanganin.
Kon unsay gusto sa mayor, o sa asawa sa mayor o sa uyab sa mayor, pilit kini nga buhaton sa sekreto nga paagi sa mga polis. Dili pwede o dili mahimo nga dili kay lisod na. Ang nakapait niini kanang paapilon na sa mga buhat nga politikal ang kapulisan ug mapugos na lang sab og buhat ang polis.
Sama sab kini sa mga casual workers nga paapilon sa kampanya sa kasamtangan nga mayor, bisan kon gidili kini sa balaod.
Kon mobalibad o di mosugot, seguradong dili na ma-renew ang maong casual worker. Mao kini hinungdan nga bisan supak sa balaod ug supak usab sa buot sa hingtungdan, wa gyoy mahimo ug mapugos na lang.
Tungod niini, mag-ampo na lang daan ang kapolisan o casual worker nga modaog ang ilang gilabanan kay kon dili, seguradong matangtang gyod sila kon molingkod na ang kaatbang sa mayor nga ilang gilabanan.
Ang pangutana, gihimo ba kini nila sa ilang kaugalingong kabubut-on o napugos lang sila kay kon mobalibad, seguradong makulban og kaldero?
* * *
Ang dugang nakapait niini mao ang pag-apil-apil sa asawa/bana, uyab o mga amigo/amiga sa mayor sa mga kalihokan sa opisina sa mayor.
Tungod tingali sa ilang pagtuo nga angay nilang suportahan ang mayor o pwede sab nga apil-apilon lang gyod sila, ang uban kanila magbuotbuot na lang sa mga kalihukan sa opisina, apil na ang pagsukit-sukit o pagpangasaba sa mga empleyado sa opisina.
Daghan na ang moyawyaw sa mga empleyado, daghan na ang magbuot-buot ug daghan na ang mangasaba sa opisina. Usahay, maglibog na ang mga empleyado kon kinsa man gyod ang ilang tuhoan tungod sa kadaghan sa ilang boss.
Mao usab kini ang mahitabo sa kapolisan kon susama niini ang kinaiya sa asawa/bana, uyab o mga amigo/amiga sa hepe sa kapolisan.
Sama sa gibutang sila sa “hazing” tungod kay pinugos man lang ang ilang pagbuhat sa isugo sa ilang labaw.
Niining paagiha, makaluluoy ang kapulisan nga nadamay lang sa pamulitika o hiwi nga mga paagi sa ilang labaw.
Kon mahunong lang unta ang pamulitika sa kapulisan, nindot unta.