GIBUTYAG sa Department of Public Works and Highways sa Davao Region (DPWH-Davao) nga punting nilang ma-inagurahan ang unang bahin sa Davao City Coastal Road sa Mayo karong tuiga, matud sa tigpamaba nga si Dean Ortiz.
Gisulti ni Ortiz niadtong Martes, Marso 28, 2023, nga ang unang bahin naglangkob sa Bago Aplaya hangtud sa Tulip Drive, hapit nang mahuman.
Sayong giplano sa DPWH-Davao nga buksan ang unang bahin sa vehicular traffic sa Abril apan ilang gisibog aron nga huwaton nga moabot ang laing giimpotar nga suplay sa konstraksiyon.
Gikanayon niya nga ang tulay ug ang barandilya hapit nang mahuman ug ang tulay nga nagdugtong sa matag bahin mosunod na, busa banabana nila nga mahuman ang nahabiling trabahuon sa Abril ug ma-inagurahan kini sa tunga-tunga sa Mayo.
"So far wala naman ta problema sa carriage way from Bago to Talomo and from Matina Aplaya to Tulip Drive. We are already prepared. We are just waiting for the completion of the bridge that will connect Barangay Talomo to Matina Aplaya," tug-an ni Ortiz sa press conference.
Hinuon, gitin-aw ni Ortiz nga ang pagbukas sa unang bahin sa Davao City Coastal Road di dayon makasulbad sa trapiko tungod kay ang dakong bahin sa proyekto ginakonstrak pa.
Dugang pa niini nga duna say posibleng paghuot pa sa may Quimpo Boulevard bisan kung abli na ang unang bahin.
"Sa karon, kana pa lang atong ma-open because wala pa man nato nasugdan ang Bucana Bridge which will connect Times Beach padulong didto sa Bucana. Dili pa gyud niya fully ma-achieve iyang purpose," pagklaro ni Ortiz.
Apan kung ang tibuok 17.3-kilometros nga coastal road mabuksan na, giseguro ni Ortiz na duna nay pagkubos sa paghuot sa mga sakyanan sa Davao City. (ICM)