Barrita: Bana nga nakapamabdos sa kabit nakonbikto

Barrita: Bana nga nakapamabdos sa kabit nakonbikto

Usa ka bana misumbong ngadto sa iyang asawa. Bana: “Naa koy problema, darling.” Asawa: “Ayaw ana, darling. Minyo gud ta. Kon unsay imong problema, ato nang problema. Unsa man diay atong problema?” Bana: “Nakapamabdos ta sa atong maid.”

Di na ni mahimong komedya karon. Gidasonan sa Korte Suprema ang pagkakonbikto sa kalapasan sa Republic Act No. 9262, ang Anti-Violence Against Women and their Children Act of 2004 (Anti-VAWC Act), sa usa ka bana nga nakigpuyo ug nakapamabdos sa iyang kabit samtang ang iyang asawa nagtrabaho didto sa gawas sa nasod.

Sa usa ka desisyon (G.R. No. 250219, XXX v. People of the Philippines) nga penetsahan og Marso 1, 2023, ang SC First Division, pinaagi ni Justice Ramon Paul L. Hernando, mi-deny sa petition for review on certiorari ni XXX ug midason sa desisyon sa Court of Appeals (CA) sa Enero 31, 2019 ug laing resolusyon niini sa Oktubre 18, 2019 nga nagkonbikto kaniya.

Nganong XXX ra ang gibutang sa ngan sa petitioner? Nunot kini sa confidentiality rule sa mga kaso sa VAWC. Ang kabahin sa Section 40 sa A.M. No. 04-10-11-SC (Rule on Violence against Women and their Children) nga giluwatan sa Korte Suprema niadtong Oktubre 19, 2004 nagkanayon:

“Records of the cases shall be treated with utmost confidentiality. Whoever publishes or causes to be published, in any format, the name, address, telephone number, school, business address, employer or other identifying information of the parties or an immediate family or household member, without their consent or without authority of the court, shall be liable for contempt of court and shall suffer the penalty of one year imprisonment and a fine of not more than Five Hundred Thousand Pesos (P500,000.00).”

Ang mga desisyon sa CA nag-affirm sa pagkonbikto sa Regional Trial Court (RTC) ni XXX kay napalgan siya nga sad-an beyond reasonable doubt sa kalapasan sa Section 5(i) sa Anti-VAWC Act nga nag-ingon nga ang maong krimen mahimo pinaagi sa paghimo og “mental or emotional anguish, public ridicule or humiliation to the woman or her child, including, but not limited to, repeated verbal and emotional abuse, and denial of financial support or custody of minor children or access to the woman’s child/children.”

Matod sa Korte Suprema, ang “marital infidelity” usa sa mga matang sa “psychological violence.” Miuyon ang Labaw’ng Hukmanan sa CA ug RTC nga anaa ang tanang mga element sa krimen sa kalapasan sa Sec. 5(i).

Mao kining mosunod: 1) ang offended party usa ka babaye o kaha iyang anak o mga anak; 2) ang babaye asawa o kaha kanhi asawa sa akusado; 3) ang akusado nakahimo og emotional anguish sa babaye o sa anak; ug 4) ang mental anguish nahimo pinaagi sa public ridicule or humiliation, repeated verbal and emotional abuse, denial of financial support or custody of minor children or access to the children or similar to such acts or omissions.

Sumala sa record sa hukmanan, si XXX ug si AAA naminyo niadtong Disyembre 29, 2006 ug dunay anak babaye nga si BBB. Ang asawa nga si AAA milarga aron motrabaho sa Singapore sa 2008. Nahibaw-an na lang ni AAA niadtong Mayo 2015 nga si XXX adunay karelasyon nga laing babaye nga si CCC ug napamabdosan kini sa iyang bana.

Gidala ni XXX si CCC sa ilang hometown mao nga mipauli si AAA ug nangayo og tabang sa Department of Social Welfare and Development aron makiha ang iyang anak nga si BBB gikan sa ugangang babaye. Mipasaka si AAA og kaso batok kang XXX nga miresulta sa iyang pagkakonbikto.

Matod sa Korte Suprema adunay daghang matang sa abuso. Ang labing klaro mao ang physical violence o pagbun-og o pagdagmal. Ang uban mao ang sexual violence, psychological violence ug economic abuse. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph