NAHIMONG hisgutanan karon sa usa ka purok sa Barangay 23-C, Isla Verde, Quezon Boulevard, Davao City ang usa ka 63-anyos nga lolo kinsa gikatahong dunay lima ka kabit.
Kini human nga midangop ang mismong asawa sa kapulisan sa Sta. Ana Police Station aron ipa-blotter ang giingong lima ka mga babaye sa iyang bana.
Una niini, usa ka Merly, ang silingan ug kumare sa reklamante nga si Edith ang mipabuhagay ngadto kaniya og istorya sa iya kunong nahibal-ang mga kabit sa bana.
Didto perte sab nga tuo ni Edith, ug sulungon unta niini ang lima nga duha sa Purok 3, duha sa Purok 5 ug usa sa Purok 7 sa maong barangay nga alegasyong mga kulokadidang ni Roger, ang 63-anyos.
Giingon nga ang nahisgutang lima, pulos sab mga edaran na, ug maoy punay nga adtoan ni Roger aron nga makipag-istorya, suma ni Merly.
Apan dako ang pagtuo ni Merly nga pulos kuno kabit kadto ni Roger, maong iya kining gisaysay sa iyang kumare nga si Edith.
Ang mga anak ni Edith giingong nagsige na lang og tambag kaniya aron nga dili na modako pa ang istorya, apan gusto gayod ni Edith nga mag-abot sila sa barangay aron didto siya matin-awan sa isyu.
Ang hitabo gihimakak ni Roger, kinsa nagbutyag nga makig-istorya lamang siya labot sa kasamtangan nga sitwasiyon sa panggobyerno.
Si Roger nailhan sa ilang purok nga magpunay og hisgot labot sa politika.