MOBALOR sa P19 milyon ang kantidad sa giismagol nga sigarilyo ang nasakmit sa Bureau of Customs (BOC) – Port of Davao niadtong miaging semana.
Sumala sa BoC-Port of Davao nga nagpatrolya ang BoC Water Patrol Division (WPD) sa Davao Coast dihang nakita ang "MV Amiesha" nga may kargamento nga gitabunan og tarpaulin didto sa kabaybayonan sa Sta. Cruz, Davao del Sur.
Dihang gisusi, ang mga tripolante niini wala nakapakita og dokumento sa bitbit nilang sigarilyo butang nga gi-hold sila sa awtoridad.
Nasakmit ang anaa sa 499 master cases nga gilangkuban sa 24,950 reams sa nagkadaiyang klase sa sigarilyo, apil sa gikustodiya ang motorized banca.
Ginasubay na karon sa BoC-Port of Davao ang tag-iya sa maong mga kontrabando aron mapasaka ang tukmang kaso.
Mga nasakmit nga sigarilyo nakalapas sa Section 117 of R.A. 10863 o "Customs Modernization and Tariff Act (CMTA) of 2016 in relation to Executive Order Number 245 entitled Amended Rules and Regulations Governing the Exportation and Importation of Leaf Tobacco and Tobacco Products.