Ang ting-init mahimong makawagtang sa suplay sa tubig sa Sugbo, sumala sa usa ka meteorologist sa kagamhanan, ug nidugang nga dunay posibilidad nga mahitabo ang El Niño phenomenon.
“The effect of this dry hot season plus the possibility of El Niño, of course [result to] scarcity of water,” matod ni Engineer Alfredo F. Quiblat Jr.,hepe sa Philippine Atmospheric, Geophysical and Astronomical Services Administration (PAGASA) Visayas Regional Services Division.
Gitambagan ni Quiblat ang publiko atol sa Openline Forum sa Martes, Marso 28, 2023, nga daginuton ang paggamit sa personal ug domestic nga konsumo sa tubig.
Naglakip kini sa paggamit sa tubig sa sulod ug gawas sa mga pinuy-anan, ug naglakip sa mga gamit sama sa pag-inom, pag-andam sa pagkaon, pagkaligo, paglaba sa mga sinina ug plato, pag-flush sa mga kasilyas, pagbisbis sa mga lawn ug mga tanaman, ug pagmentinar sa mga swimming pool.
Sa pagkakaron didto sa Luzon, matod ni Quiblat, adunay gikataho nga mga timailhan sa pagkunhod sa lebel sa mga water dam, nga dili layo nga mahitabo sa Sugbo.
“Daan na ra ba ta nagkuwang sa tubig. The dry season would mean below normal rainful,” matod niya.
Si Minerva Gerodias, tigpamaba sa Metropolitan Cebu Water District (MCWD) nitug-an sa SunStar Cebu sa Martes, Marso 28, 2023, nga nius-os og gamay ang produksiyon sa tubig sa Buhisan dam.
Matod pa ni Gerodias nga gikan sa average nga produksiyon niini nga 5,000 cubic meters matag adlaw, sa pagkakaron, nakasinati kini og 30 porsiyento nga pagkunhod.
Ang Buhisan dam, bugtong water dam sa MCWD, ang kasamtangang nag average og produksiyon nga 3,500 cubic meters matag adlaw.
Hinuon, open source sab sa MCWD ang sapa sa Jaclupan sa dakbayan sa Talisay, nga nius-os sab og gamay ang average production kada adlaw.
“Since ang source ana river, ni-down na sad siya gamay—slight lang. Ang usual ana niya is 30,000 cubic meters per day, karon 25,000 cubic meters per day,” dugang pa niya.
EL NIÑO
Gikumpirmar usab ni Quiblat ang posibilidad sa El Niño nga adunay probability rate nga 55% nga mahimong motaas.
“There is a possibility of El Niño for this year some time in July, there is already an indication based on the analysis,” matod ni Quiblat, nidugang nga ilang gibantayan og maayo ang panghitabo.
Sa El Niño dunay kahigayunan nga ubos sa kasarangan ang pag-ulan, nga mahimong hinungdan sa mga ting-ulan ug hulaw sa lainlaing bahin sa nasod.
Ang El Niño adunay potensyal nga makapakunhod pag-ayo sa suplay sa tubig, nga mahimo usab nga moresulta sa dagkong mga pagkawala sa output sa agrikultura. (KJF)