Kon duna kay traffic violations ug wa ka pa mibayad sa multa, mas maayong adtuon nimo ang traffic office diin ka nakalapas.
Kon di ka mobayad sa multa, di ka maka renew sa imong driver’s license.
O kon wa ka pay bisan unsa nga kalapasan sa balaod sa trapiko, mas maayong mag-amping ug magmatngon ka sa pagmaneho, o undang kon usa ka sa gitawag og “kamote driver” apan wa pa lang madakpi.
Kay ang Land Transportation Office (LTO) ug mga local government unit (LTO) magsawo na unya og records sa mga traffic violation base sa memorandum circular nga giluwatan ni LTO Chief, Assistant Secretary Jose Arturo Tugade niadtong Marso 6, 2023.
Ubos sa memorandum hinuon, gikinahanglan pa nga ang LTO ug hingtungdang mga LGU mopirma una og Data Sharing Agreement (DSA) nga maglatid sa mga responsibilidad sa mga buhatan sa integridad sa data nga makuha.
Usa ka tigom sa Martes, Marso 28, 2023 ang gipahigayon alang niini tali kang manlalaban Noreen Bernadette San Luis-Lutey, chairperson sa Interconnectivity System Management sa LTO ug sa mga opisyal sa Cebu City Transportation Office (CCTO), Talisay City Traffic Operations and Development Authority (CT-TODA) ug Traffic Enforcement Agency of Mandaue (TEAM) sa mayor’s conference room sa Cebu City hall.
Si Jonathan Tumulak, pangu sa CT-TODA, niingon nga kon mapatuman na ang mao nga sistema, di na maka-renew sa ilang lisensya ang mga drayber nga nakalapas sa balaod sa trapiko kon di mabayran ang tanang multa sa mga kalapasan.
“Dapat i-settle daan sa violator ang iyang penalty kon asa siya naka-violate,” matod ni Tumulak sa Superbalita Cebu.
Hinuon, iyang gipasabot nga ila pang tun-an ang mga probisyon sa memorandum ug ila kining itugyan ngadto sa Konseho nga mao nay moaprobar alang sa Siyudad sa pagsulod og kasabutan tali sa LTO.
“Bag-o pa mi nahibawo sa MC. Amo pa tun-an ang MC. Duna pa mi mga pangutana sa CT-TODA ug amo pa ipaabot sa Konseho,” pagpasabot ni Tumulak.
Matod ni Tumulak nga tumong niini mao ang pagdisiplina sa mga drayber nga nag-isip nga gaan ra ang mga multa nga ipahamtang sa mga traffic body sa matag LGU kay sa naandang gipahamtang sa LTO kon ang ilang personnel ang makadakop.
Kon mag-amping na ang mga driver, mas luwas na ang kadalanan.
KONEKTADO
Base sa memorandum, ang data base sa mga LGU traffic body konektado na sa Land Transportation Management System (LTMS).
Busa ang mga personnel sa LTO makakita na sa records sa local traffic agencies diin natala ang record sa mga nakalapas ug unsa ang kalapasan nga nahimo niini.
Niini, dunay demerit point nga makuha sa matag kalapasan sa drayber nga matala ngadto sa Law Enforcement and Traffic Adjudication System (LETAS).
Base sa record, madeterminar sa LTO kon unsa nga silot ang mapahamtang sa drayber nga nakalapas, suspensuhon ba siya, ang kadugayon niini, o rebokahon ba ang iyang lisensya sa pagmaneho.
Kining tanan magdepende sa kabug-aton ug kadaghan sa iyang mga kalapasan.
Busa, karon pa lang, mas maayong mosunod sa mga balaod sa trapiko aron di maapeke sa umaabot nga mga adlaw. (REV)