Kon mobiyahe ka sunod semana agi sa mga pantalan sa Sugbo, ayaw kahibung kon makakita ka og mas daghang security personnel.
Gawas nga modoble ang gidaghanon sa security personnel, duna say K-9 nga ipakatap.
Kini tugod kay ang Cebu Port Authority nipaubos sa heightened alert sa tanang mga pantalan sa dakbayan ug lalawigan sa Sugbo gumikan sa nagsingabot nga Semana Santa nga maoy direktiba ni Transportation Secretary Jaime Bautista.
Gumikan sa Semana Santa ug Summer Vacation 2023, ang CPA mopahugot sa ilang seguridad isip tubag sa direktiba ni Bautista.
Sayo niining semanaha, ang CPA pinaagi sa Port Security, Safety and Environmental Management Department (PSSEMD) nihuman sa tanang pagpangandam alang sa gipaabot nga pagdagsa sa mga pasahero uban sa koordinasyon sa tanang mga opisyal sa pagdumala sa pantalan sa Sugbo.
Kini gilangkuban sa maritime ug enforcement partners gikan sa Philippine Coast Guard (PCG), Philippine Navy, Philippine Drug Enforcement Agency (PDEA), Bureau of Customs (BOC), Maritime Industry Authority (MARINA) Bureau of Fire Protection (BFP), Philippine National Police (PNP) Waterfront Police Station, Mabolo Police Station, ug Regional Maritime Unit.