Maestro mag-atubang og duha ka mga count sa kasong pagpanglugos human giingong gilugos niya ang 15 anyos niyang babayeng tinun-an sa lungsod sa Catmon, Cebu.
Ang menor de edad nga biktima tinun-an sa senior high, taga lungsod sa Sogod.
Mga ngan sa suspek ug biktima, ingon man ngan sa tunghaan, gipugngan ning mantalaan aron kapanalipdan ang identity sa tinun-an.
Si Police Lt. Teofilo Manlanat, hepe sa Catmon Police Station nga nahinabi sa dySS Super Radyo Cebu,nibutyag nga ang maong tinun-an nireklamo nga gihilabtan siya sa 38 anyos niyang maestro niadtong Marso 24, 2023.
Ang suspek minyo, taga Barangay Macaas, Catmon, gipasakaan na og kaso ug matod pa nangangkon nga uyab niya ang biktima.
Ang biktima nibutyag nga alas 6:30 sa buntag niadtong Biyernes, sayo siyang niabot sa ilang eskwelahan.
Gitawag siya sa ilang magtutudlo sa classroom ug wa magdugay nisulod sa comfort room (CR) ug giingong siya gipasunod.
Nisanong ang biktima ug nisunod sa CR, apan giingong gisira sa suspek ang pultahan ug sa sulod giingong siya gipahimuslan.
Nipasangil ang biktima nga dili kini unang higayon sanglit gilugos na usab siya niini sa miaging mga adlaw. Atol niining pagsuwat, pabiling gawasnon pa ang suspek. (GPL)