Nirehistro si Stephen Curry og 39 puntos lakip na niini ang walo ka three-pointers aron agakon ang host Golden State Warriors ngadto sa mahinungdanong kadaugan batok sa New Orleans Pelicans, 120-109, ning Miyerkules, Marso 29, 2023 (PH time), sa National Basketball Association (NBA).
Ang Warriors, nga maoy defending champions, ningsaka sa ikaunom nga dapit sa Western Conference dala ang 40-37 nga rekord.
Niini, ninghayag ang paglaom sa Warriors nga makaderetso sa playoffs nga dili na moagi sa makuyaw nga Play-in Tournament.
Ang mopatigbabaw nga unom ka teams sa matag conference mao ang makaderetso sa playoffs samtang ang No. 7 hangtod No. 10 teams mao ang mosubay sa Play-in Tournament aron ilugan ang nahabiling duha ka mga luna sa playoffs.
Ning sangkaa, tataw nga nagdilaab ang determinasyon sa Warriors hilabi na kay nagkaduol na ang tumoy sa regular season.
Si Jordan Poole nimugna og 21 puntos lakip na niini ang sunodsunod nga layups nga nagpa-rally sa Warriors sa sayong bahin sa 4th quarter.
Si Klay Thompson niamot og 17 puntos lakip na niini ang lima ka three-point shots aron pagposte og bag-ong single-season career high nga 278 three-point shots, nag-una sa NBA.
Ang Warriors gikan sa masakit nga kapildihan, 99-96, batok sa Minnesota Timberwolves hinungdan nga gihapak nila ang ilang kapungot ngadto sa Pelicans.
“We lost a heartbreaker the other night. We knew we had to bounce back,” matod ni Warriors coach Steve Kerr.
Igo ra man tuod nakatampo og walo ka mga puntos si Draymond Green sa kadaugan apan ang iyang nagbukal nga emosyon nakatakod sa iyang mga kauban.
“Draymond willed us to victory tonight,” matod ni Kerr. “His frustration early with the way we were playing. Mad at the world. Yelling at everybody, their bench, our bench, me, and frankly we all deserved it.”
Sa kapildihan, ang Pelicans ningdakin-as sa ikawalo nga dapit sa Western Conference dala ang 38-38 nga rekord.
Gipangulohan ni Brandon Ingram ang Pelicans pinaagi sa iyang 26 puntos, nihatag og 21 puntos si Trey Murphy III samtang niamot og 15 puntos si CJ McCollum. (AP)