Hingpit nga gibutlogan sa Brgy. Ginebra Gin Kings ang igsuon nilang puwersa nga San Miguel pinaagi sa pagtali og makutas nga 87-85 nga kadaugan sa Game 3 sa ilang semi-finals series sa Philippine Basketball Association (PBA) Governor’s Cup sa premirong duwa ning Miyerkules, Marso 29, 2023, sa Smart Araneta Coliseum.
Ning maong kadaugan, sayo nga gihuman sa Gin Kings ang best-of-five series.
Ang dul-it nga itsa ni Fil-German Christian Standhardinger gikan sa pasa ni import Justin Brownlee sa nahabiling upat ka mga segundos mao ang naghatag sa Gin Kings sa kadaugan.
Sa return play, nasipyat si Beermen guard Marcio Lassiter sa iyang pag-itsa sa dayong pagtingog sa final buzzer nga mao unta ang makapugos og overtime.
Kanunay untang naglabaw og dobleng numero nga puntos ang Beermen apan ninggukod ang Gin Kings sa 4th quarter aron ilugon ang kadaugan.
Tanang starters sa Gin Kings ningmugna og dobleng numero nga mga puntos nga gipangulohan sa 22 ni Brownlee.
Niamot og 17 si Scottie Thompson alang sa Gin Kings, nihatag og 14 si Standhardinger, nitunol og 13 si Jeremiah Gray samtang nipupo og 12 si Jamie Malonzo.
Mao kini ang labing unang higayon nga nabutlogan ang Beermen sa usa ka best-of-series.
Ang Beermen, nga padayong ningkombati nga wala ang Sugboanong higante nga si June Mar Fajardo (adunay angol), gipangulohan ni import Cam Clark pinaagi sa iyang 16 puntos, nitampo og 14 si CJ Perez, nidugang og 13 si Lassiter, niamot og 12 si Jericho Cruz samtang nitunol og 11 si Simon Enciso. (ESL)