Inoue batok Fulton giuswag sa Hulyo 25

Aduna nay bag-o nga petsa ug lugar ang nauswag nga panagsangka nila ni Naoya “Monster” Inoue ug American Stephen Fulton.

Ipahigayon na kini karong Hulyo 25, 2023 sa Ariake Arena sa Tokyo, Japan.

Ang away orihinal nga gikatakda karon untang Mayo 7, 2023 sa yutang natawhan ni Inoue sa Yokohama, Japan apan nauswag kini human nakasinati og angol sa iyang tuhod si Inoue atol sa iyang training.

Sa interbyu sa www.boxingscene.com, gipasalamatan ni Inoue ang kampo ni Fulton sa pagdawat sa bag-ong petsa ug lugar sa gikahinamang away sa 2023.

Ning awaya, depensaan ni Fulton ang iyang unified World Boxing Council (WBC) ug World Boxing Organization (WBO) super bantamweight titles.

Mao kini ang labing unang away ni Inoue sa super bantamweight human niya gibuhian ang iyang undisputed titles sa bantamweight.

Ang duha ka mga boksidor parehong wala’y pilde.

Si Inoue naggunit og 24-0, 21KOs nga rekord samtang si Fulton naghupot og 21-0, 8KOs nga baraha. (ESL)