Sa miaging mga tuig, gibaraw ni Land Transportation Office (LTO 7) Regional Director Victor Caindec ang giingong kalangay sa mga motorcycle dealer sa pag-release sa registration sa motorsiklo nga ilang gipamaligya.
Sa Republic Act 11235 kun Motorcycle Crime Prevention Act, lima ka mga adlaw sukad napalit ang motorsiklo kinahanglan nga marehistro na kini ngadto sa LTO ubos sa ngan sa tag-iya.
Apan di magamit sa buyer ang motorsiklo nga napalit kay ang Certificate of Registration (CR) ug Official Receipt (OR) mga duha ngadto sa tulo ka buwan pa ma release. Ang LTO maoy ilang gibasol.
Apan si Caindec niingon nga ang mga dealer ang mabasol, di sila.
Karong bag-o, naisyu na sab kini human ang usa sa mga editor sa SunStar, si Tito Tan, wa makagamit sa iyang motorsiklo nga napalit kay wa pa ang OR ug CR. Human naisyo ang iyang kasinatian, gi-release gilayon ang iyang registration.
Sa pag post sa SunStar sa social media sa balita, daghan ang nangomentaryo sa samang kasinatian. Naa pay tinuig na, wa gihapon nila ang CR.
Nipasalig si Caindec nga kon duna may mga reklamo nga sama niini, iya dayon kining aksyunan kay sa nangagi, duna na siyay gipangkiha nga motorcycle dealers.
Apan makapaguol baya ning krusada ni Caindec kay ingon sa nag-inusara siya nga opisyal sa LTO nga naghimo ning mao nga lakang.
Ambot lang kaha kon nganong hangtod karon wa man mausab ang buhat sa motorcycle dealers, naa gihapon ang pagmagahi nila sa pagtuman sa balaod.
Unsa kahay nakapaisog ani nila? Tungod ba kay naa silay gipangsandigan nga dagko sab sa LTO nga untouchables nga bisan si Caindec di makapiog?
Samtang saba kaayo si Caindec, ang dealers nagbasol sa LTO nga maoy nakaingon sa kalangay sa pag release sa rehistrasyon.
Yuna pa, kon ang LTO ang mabasol, nganong ang kang Tito Tan na-release man sa samang adlaw sa iyang pagreklamo?
Hinaot pa unta nga maklaro sa publiko asa ang napalyar nga sistema, sa LTO o sa motorcycle dealers. Kay hangtod karon nahulog pang sila nagtulodtulod.
Apan kon gusto sa LTO nga tinud-on ang pagklaro kinsa ang paltos, dasigon nila pagreklamo ang mga kustomer aron basehan sa imbestigasyon sa ingon dunay mapahamtangan og silot ug masuta kinsa ang nagkuwang.