Nihangyo ang konseho sa Barangay Maghaway ngadto sa Konseho sa Dakbayan sa Talisay nga ipatuman ang truck ban sa ilang dapit aron malikayan ang dugang disgrasya kay dunay mga tinun-an nga maglakaw sa daplin sa dalan panahon sa tingklase.
Si Bise Mayor Richard Francis “Choy” Aznar nibutyag nga niabot na sa iyang opisina ang resolusyon sa konseho sa barangay hinungdan nga ilang gibuhat ang unang committee hearing.
Matod ni Aznar nga nakasabot sila sa hangyo sa barangay apan ang unang panagtigom ila unang gipadaplin aron ipatawag ang komitiba sa solid waste ug sa traffic kay apil sa ilang gipasabot ang truck nga magdala og basura gikan sa pagkolekta paingon sa paglabay og mga basura sa dump site sa Barangay Tapul.
Ang oras sa truck ban nga ilang gihangyo magsugod sa alas 6 sa buntag hangtod sa 8 sa buntag, mobalik sa alas 3 ngadto sa alas 5 sa hapon.
Ang mao nga mga oras maoy pagsulod ug paggawas sa kabataan gikan sa ilang tunghaan.
Ang landfill sa Talisay nahimutang sa Tapul ug ang mga truck moagi sa Barangay Linao ug Maghaway.